Савіцкі Забіў Люксембургу Вярнуцца да спісу
Нацыянальная зборная Беларусі правяла свой трэці адборачны матч у рамках кваліфікацыі да чэмпіянату свету. На гэты раз супернікам нашай каманды была зборная Люксембурга, з якой да гэтага беларусам давялося згуляць 8 афіцыйных матчаў (+4=3-1, мячы 9-3). Ва ўсіх чатырох пераможных матчах наша каманда забівала люксам па два мяча, аднаго забітага мяча хапала толькі для нічыёй. Так выйшла і гэтым разам. Маючы гульнявую перавагу і пяць-шэсць верных момантаў для ўзяцця брамы, наша каманда прымудрылася зноў страціць ачкі ў гульні з Вялікім Герцагствам.
Надзея на перамогу вярнулася да заўзятараў за 10 хвілін да канца асноўнага часу, калі беларусы нарэшце змаглі адправіць мяч у сетку брамы Морыса. Свой першы мяч у афіцыйных сустрэчах зборнай забіў Павел Савіцкі, які выйшаў на поле за дзевяць хвілін да гэтага знамянальнай моманту. Палякоў прыняў мяч у правай бакавой лініі штрафной і верхам накіраваў яго ў цэнтр, дзе ўдала з ім сустрэўся паўабаронца «Нёмана», галавой паслаўшы мяч у далёкі верхні кут Люксембургскай брамы. Савіцкі цалкам мог запісаць сваё прозвішча ў пратакол і раней, аднак першым сваім дотыкам праверыў на трываласць каркас брамы.
А за пяць хвілін да канца на дапамогу гасцям падаспеў рыкашэт. Жаошым з штрафнога трапіў мячом у спіну Гардзейчука, ад якой той і ўляцеў па цэнтры апусцелай брамы. Зноў у матчы з Люксембургам нам прыходзіцца здавольвацца толькі нічыёй. Вельмі нязручны, трэба адзначыць, для беларусаў супернік.
Павел САВІЦКІ:
— Мы цалкам перайгралі Люксембург, але, на жаль, не рэалізавалі свае моманты, што ў першым тайме, што ў другім. У выніку, адна выпадковасць, адзін рыкашэт – і мы прапусцілі і страцілі ачкі. Не ведаю, чаму нам атрымалася забіць толькі пасля майго выхаду. Напэўна, проста так атрымалася. Вядома, я хацеў дапамагчы камандзе забіць. Калі мяне выпускалі на поле, проста прасілі гуляць на сваёй пазіцыі і рабіць тое, што ўмею, – сказаў паўабаронца «Нёмана» football.by пасля матча.
Адборачны матч Чэмпіянату Свету 2018. Група "А".
БЕЛАРУСЬ — ЛЮКСЕМБУРГ – 1:1 (0:0)
Панядзелак, 10 кастрычніка 2016 года. БАРЫСАЎ — Стадыён "Барысаў-Арэна" (умяшчальнасць – 13 126). __ гледачоў. Пачатак матча – 21:45 (час мясцовы).
+4 °С, пераменная воблачнасць / электраасвятленне.
Галоўны суддзя – Тобаас Вельц, памочнікі суддзі – Рафаэль Фольцін і Майк Пікель, рэзервовы суддзя – Басціан Данкерт (усе – Германія). Інспектар сустрэчы – Алмейда Кошта (Партугалія), дэлегат УЕФА – Буяр Касмі (Албанія).
БЕЛАРУСЬ: 22.Гарбуноў А. – 19.Бардачоў М. (13.Валадзько М., 78), 21.Філіпенка Я., (к) 3.Мартыновіч А., 5.Палякоў Д. – 11.Гардзейчук М., 10.Глеб А., 7.Корзун М., 18.Маеўскі І. (9.Савіцкі П., 71), 23.Калачоў Ц. – 20.Сігневіч М. (8.Карніленка С., 60). Запасныя: Гутар А., Чэрнік С. – Драгун С., Клапоцкі Я., Паліцевіч С., Крывец С., Кісляк, Рыос А., Сівакоў М. Галоўны трэнер – Аляксандр Хацкевіч.
ЛЮКСЕМБУРГ: 1.Морыс А. – 13.Карлсон Д., 8.Марцінш Перейра К. (11.Вейга Э., 35), 6.Філіпс К., 15.Дзельгаду Р. – 5.Бонэр Ф. (20.Цюрпель Д., 72), 9.да Мота Д., (к) 17.Мутш М., 10.Тіль В. (19.Йеніш М., 46), 18.Янс Л. – 22.Жоашім О. Запасныя: Шон – Сімон, Скендаровіч, Халль, С.Ціль, Дэвіль. Галоўны трэнер – Люк Хольц.
Галы: 1:0 — П.Савіцкі (80, пас – Д.Палыкоў), 1:1 — О.Жоашім (85, з штрафнога).
Папярэджанні: М.Корзун (11), Д.Карлсон (13), Р.Дзельгаду (36), М.Сігневіч (48), М.Бардачоў (53), О.Жоашім (54), С.Карніленка (75), А.Мартыновіч (84).
Вадаленні: Д.Карлсон (44).
Пасля трох тураў адборачнага цыклу зборная Беларусі заняла ў сваёй групе звыклае для сябе пятае месца: Швецыя – 7 ачкоў (3 гульні), Францыя – 7 (3), Галандыя – 4 (3), Балгарыя – 3 (3), Беларусь – 2 (3), Люксембург – 1 (3). Наступны адборачны матч наша каманда правядзе 13 лістапада на выездзе супраць Балгарыі. Наш будучы супернік на старце кваліфікацыі дома мінімальна перайграў Люксембург 4:3, а затым зазнаў дзве буйных паразы, саступіўшы на выездзе французам 1:4 і шведам 0:3.
