Дасягненні

КУБАК І СРЭБРА

За час існавання гродзенскага клуба яму скарылася толькі адна з футбольных вяршыняў: у 1993 годзе жоўта-зялёныя сталі ўладальнікамі Кубка Беларусі. Праз дзевяць гадоў каманда была за крок ад перамогі ў чэмпіянаце краіны, але ў дадатковым матчы за званне чэмпіёна гарадзенцы прайгралі 0:1 барысаўскаму БАТЭ.

ЧЭМПІЯНАТ СССР

  • умоўна 73–76-я каманда краіны ў 1969 годзе (Д2, 14-е месца ў сваёй падгрупе)

Прынята лічыць, што годам заснавання клуба з’яўляецца 1964-ы. Менавіта ў гэты год наша каманда была дапушчана да спаборніцтваў саюзнага маштабу. Гродзенскі «Нёман» стаў паўнапраўным членам класа «Б», які быў трэцім дывізіёнам першынства СССР. Да з’яўлення на палітычнай карце свету Рэспублікі Беларусь гродзенскі клуб правёў у чэмпіянатах Саюза 28 сезонаў, два з якіх каманда згуляла узроўнем вышэй. У 1967 годзе каманда пад кіраўніцтвам старшага трэнера Вадзіма Радзішэўскага стала другой у 1-й зоне РСФСР, пасля чаго адбыліся паўфінал Саюзных рэспублік, а затым фінал, перамогшы ў якім, «Нёман» пайшоў на павышэнне. У 1968 і 1969 гадах «Нёман» выступаў у другім па сіле дывізіёне краіны, які ў той час меў назву «Другая група класа “А”».

Менавіта тады наша каманда дасягнула свайго найлепшага выніку ў чэмпіянатах СССР. Нягледзячы на тое, што самым паспяховым сезонам стаў сезон-1969, калі каманда заняла 14-е месца з 21 у сваёй падгрупе (падгрупа 4 другой групы класа «А»), з прычыны рэфармавання структуры першынства СССР гарадзенцы пакінулі другі дывізіён і больш туды не вярталіся, хоць былі вельмі блізкія да гэтага ў пачатку 80-х. Найвышэйшым дасягненнем стала ўмоўная пазіцыя 73–76-й каманды краіны.

Аднак калі прыняць пад увагу найвышэйшае дасягненне гарадзенцаў у 2-й лізе (Д3) – першае месца ў сваёй зоне і за ім другое месца ў адной з трох груп у пераходным турніры, – то найвышэйшае ўмоўнае месца каманды акажацца 46–48-м.

КУБАК СССР

  • выхад у 1/8 фіналу ў розыгрышы 1986/87 гг.

У Кубку СССР сітуацыя з вызначэннем найлепшага сезону прасцейшая. У розыгрышы 1986/87 гг. гродзенскі «Хімік» пад кіраўніцтвам Вячаслава Сівакова дайшоў да 1/8 фіналу, дзе саступіў у гасцях сімферопальскай «Таўрыі» з лікам 3:4 і выбыў з далейшай барацьбы. У 1/4 фіналу наш крыўдзіцель пасля безгалявога супрацьстаяння па пенальці перайграў прадстаўніка вышэйшага дывізіёна харкаўскі «Металіст», а ў паўфінале саступіў дома мінскаму «Дынама». Па выніках гэтага розыгрышу наша каманда ўвайшла ў лік 16 наймацнейшых каманд СССР.

ЧЭМПІЯНАТ БЕЛАРУСІ

  • срэбраны прызёр чэмпіянату Беларусі-2002

Пасля развалу Савецкага Саюза ў Беларусі сталі праводзіць свае футбольныя спаборніцтвы. Гродзенскі «Хімік» (а неўзабаве – «Нёман») з першага суверэннага чэмпіянату выступае ў наймацнейшым дывізіёне Беларусі і за гэты час толькі адзін раз змог узняцца на п’едэстал гонару. Найлепшым дасягненнем сталі срэбраныя ўзнагароды каманды Сяргея Саладоўнікава ў чэмпіянаце Беларусі 2002 года. Чатыры разы гарадзенцы спыняліся за крок ад бронзавых узнагарод, займаючы чацвёртыя выніковыя месцы ў чэмпіянатах 1992/93, 2000, 2001 і 2013 гадоў.

«Нёман» у чэмпіянатах Беларусі

КУБАК БЕЛАРУСІ

  • уладальнік Кубка Беларусі 1993 года
  • фіналіст Кубка Беларусі 2011 года
  • фіналіст Кубка Беларусі 2014 года

Сапраўдная ж перамога ў нас была толькі адна, хоць да фіналу Кубка Беларусі каманда даходзіла тройчы. Гродзенскі «Нёман» стаў уладальнікам Кубка Беларусі ў розыгрышы 1992/93 гадоў, калі ў фінале перайграў рэчыцкі «Ведрыч» з лікам 2:1. Галоўным трэнерам каманды пераможцаў быў Станіслаў Уласевіч, а капітанская павязка належала Сяргею Саладоўнікаву.

«Нёман» у кубках Беларусі

ЕЎРАКУБКІ

  • Кубак Кубкаў (папярэдні раўнд у розыгрышы 1993/94 гг.),
  • Кубак УЕФА (папярэдні раўнд у розыгрышы 2003/04 гг.),
  • Кубак Інтэртота (1-ы раўнд у розыгрышы 2005 г.),
  • Ліга Еўропы (2-і кваліфікацыйны раўнд у розыгрышы 2014/15 гг.)

Кубкавая перамога 1993 года дазволіла гродзенскаму клубу стаць другой камандай нашай краіны, якой выпаў гонар пазмагацца на еўраарэне. З тых часоў «Нёман» чатыры разы стартаваў у розыгрышах еўрапейскіх кубкаў, аднак ні разу не змог прабіцца далей за свой першы раўнд. Супернікамі нашай каманды былі швейцарскі «Лугана», румынская «Сцяўа» з Бухарэста, чэшская «Тэскома» са Зліна і ісландскі «Хабнарф’ёрдзюр» з аднайменнага горада.