Турнір на прызы Сяргея Гарлуковіча Вярнуцца да спісу
З 6 па 8 кастрычніка 2016 года ў Магілёве на базе гарадской СДЮШАР №7 прайшоў Міждзяржаўны турнір на прызы алімпійскага чэмпіёна Сяргея Гарлуковіча. Спаборніцтва мае ўжо доўгую гісторыю і ў гэтым годзе праводзілася ў трынаццаты раз.
У цяперашнім турніры прымалі ўдзел 6 юнацкіх каманд 2003 года нараджэння: ДЮСШ «Белшына» (Бабруйск), СДЮШАР №8 (Гомель), СДЮШАР «Нёман» (Гродна), ОЦОР (Брэст), «Экспрэс» (Вялікія Лукі, Расія) і каманда гаспадароў СДЮШАР №7 (Магілёў). Выбар упаў на хлопчыкаў 2003 года нараджэння не выпадкова. Адной з мэтаў арганізатараў было жаданне праверыць гатоўнасць юных футбалістаў вобласці перад Рэспубліканскай спартакіядай школьнікаў у 2017 годзе.
Турнір прайшоў па кругавой сістэме. Непасрэдна перад адкрыццём турніру прайшлі першыя матчы каманд. Гродзенцы ва ўпартай барацьбе стартавалі з перамогі, мінімальна перайграўшы брэсцкую каманду 1:0 (гол забіў Максім Карабінскі).
У другі дзень нашы хлопцы ўпэўнена правялі першы тайм матчу супраць аднагодкаў з Магілёва і забілі два мячы, аднак пасля перапынку гульня разладзілася. Гродзенцы здзейснілі некалькі грубых гульнявых памылак і дазволілі суперніку тройчы адправіць мяч у сетку нашай брамы – параза 2:3 (галы – Альфрэд Мазурыч, Максім Карабінскі). У другім матчы другога гульнявага дня жоўта-зялёныя ўпэўнена перайгралі бабруйскіх аднагодкаў 3:0 (галы – Мікіта Карпук, Вадзім Баркоўскі і Максім Карабінскі).
У заключны дзень трэба было згуляць з расіянамі, якія знаходзяцца ў ніжняй частцы турнірнай табліцы Гомелем, які знаходзіцца на першым месцы. На працягу амаль ўсяго матчу з «Экспрэсам» нашай камандзе давялося адыгрывацца. Гродзенцы праявілі характар і ўсё ж зраўнялі лік у самым канцы сустрэчы – 1:1 (гол – Вадзім Баркоўскі). Перад заключным турам склалася цікавая сітуацыя: у выпадку перамогі гродзенцы станавіліся пераможцам турніру, а ў выпадку паразы маглі не трапіць у прызавую тройку. На жаль, адбылося другое. Гомельскія хлопцы скарысталіся памылкамі нашых гульцоў і тройчы адправілі мяч у браму нашай каманды. Параза 0:3 і толькі чацвёртае выніковае месца.
Выязны склад гродзенскай каманды (трэнеры Алег Савасцьянік і Дзмітрый Агароднік): Сотнікаў Уладзіслаў, Довкшіс Пётр, Гурэнка Аляксей, Падзялінскі Данііл, Тарасюк Кірыл, Карабінскі Максім, Карпук Мікіта, Мазурыч Альфрэд, Рускіх Мікіта, Баркоўскі Вадзім, Лапінскі Максім, Жук Канстанцін, Дзядкоўскі Арцём, Міхалюк Павел, Балінскі Мікіта, Крыштоповіч Дзяніс.
Лепшым гульцом каманды быў прызнаны Альфрэд Мазурыч, а лепшым паўабаронцам турніру – Канстанцін Жук.
Сяргей ГАРЛУКОВІЧ:
— Калі гэты турнір існуе, то мая прысутнасць на ім павінна быць абавязковым. Апошнія чатыры гады я нязменна прыязджаю да хлопцаў. Я думаю, не кожная вобласць можа пахваліцца тым, што ў яе ёсць такі турнір. І не важна, чыім імем ён названы. У хлопцаў ёсць магчымасць у лішні раз атрымаць спаборніцкі досвед з камандамі з іншых рэгіёнаў і краін – гэта вельмі важна. Дзякуй тым людзям, якія дапамагаюць праводзіць спаборніцтва. Спадзяюся, што ён будзе існаваць яшчэ вельмі доўга. У гэтых дзяцей усё наперадзе, галоўнае – гэта працавітасць. Ёсць жа футбалісты ў камандах майстроў, якія прайшлі як раз праз турнір на прызы Гарлуковіча.
Сяргей Гарлуковіч нарадзіўся ў вёсцы Баруны Ашмянскага раёна Гродзенскай вобласці. У раннім узросце пераехаў у Магілёў, з'яўляецца выхаванцам магілёўскай СДЮСШАР №7. У Беларусі гуляў за каманды «Тарпеда» (Магілёў), «Гомсельмаш» (Гомель) і «Дынама» (Мінск). Алімпійскі чэмпіён Сеула 1988 года ў складзе зборнай СССР, чатырохразовы чэмпіён Расіі, выступаў за маскоўскія клубы «Лакаматыў» і «Спартак», дортмундскую «Барусію» і «Баер 05» з Крефельда. Пасля завяршэння гульнявой кар'еры працуе футбольным трэнерам.
СТАТЫСТЫКА
| # | каманды | 1 | 2 | 3 | 4 | 5 | 6 | мячы | а |
|---|---|---|---|---|---|---|---|---|---|
| 1 | СДЮШАР №8 (Гомель) | Х | 1:1 | 3:1 | 3:0 | 4:1 | 2:0 | 13 – 3 | 13 |
| 2 | АЦАР (Брэст) | 1:1 | Х | 3:1 | 0:1 | 2:0 | 4:0 | 10 – 3 | 10 |
| 3 | СДЮШАР №7 (Магілёў) | 1:3 | 1:3 | Х | 3:2 | 3:2 | 5:1 | 13 – 12 | 9 |
| 4 | СДЮШАР «Нёман» (Гродна) | 0:3 | 1:0 | 2:3 | Х | 1:1 | 3:0 | 7 – 7 | 7 |
| 5 | «Экспрэс» (Вялікія Лукі, Расія) | 1:4 | 0:2 | 2:3 | 1:1 | Х | 4:1 | 8 – 11 | 4 |
| 6 | ДЮСШ «Белшына» (Бабруйск) | 0:2 | 0:4 | 1:5 | 0:3 | 1:4 | Х | 2 – 18 | 0 |
