Тыдзень без параз Вярнуцца да спісу

U15

Самыя малодшыя нашы прадстаўнікі ў першынстве ліцэнзавання працягваюць прыемна здзіўляць. У панядзелак падапечныя Артура Крываноса атрымалі другую перамогу ў чэмпіянаце, на гэты раз дома былі бітыя юныя брэсцкія дынамаўцы. Як і ў папярэднім матчы супраць «Іслачы» нашы хлопцы забілі па аднаму голу ў кожным тайме і ўпэўнена давялі справу да перамогі. Галамі адзначыліся капітан каманды Эдуард Пакачайла і Арцём Кітурка. Варта адзначыць, што гэта трэці «сухі» матч у выкананні нашай самай юнай каманды. Ні «Мінск», ні «Іслач», ні «Дынама-Брэст», распячатаць браму гродзенцаў не змаглі.

Пасля трох тураў каманда Крываноса мае сем набраных ачкоў і толькі па розніцы мячоў саступае «Мінску» і «Шахцёру» пешы радок у турнірнай табліцы (індывідуальная статыстыка і расклад матчаў у закладцы «статыстыка»). Сёння хлопцы на выездзе згуляюць свой чацвёрты матч супраць мікашэвіцкага «Гранітf». Пажадаем поспехаў хлопцам!

U16

Каманда Віктара Юйко ў хатнім матчы супраць аднагодкаў з Брэста была блізкая да перамогі, але небяспечныя моманты толькі такімі і засталіся. Нельга сказаць, што перавага гаспадароў былf вялікfq, аднак забіваць гродзенцы павінны былі мінімум чатыры-пяць разоў. Да перапынку не рэалізаваў выхад адзін на адзін Кануннікаў, маглі адкрываць лік у матчы Лісоўскі, далёкімі ўдарамі Якавенка і Ванюкевіч. У другой палове сустрэчы з лініі брамавай прабіў міма пустой брамы Хох, не рэалізаваў галявы момант Семянчук. Хлопцам не хапае стрыманасці, а камандзе - цэласнасці гульні. Будзем спадзявацца, што ўсё ў хлопцаў наперадзе.

Пасля трох гульнявых дзён наша каманда  з чатырма ачкамі займае чацвёртае месца (індывідуальная статыстыка і расклад гульняў у закладцы «статыстыка»). Сёння хлопцы будуць змагацца ў гасцях з «Гранітам», які яшчэ ні разу не прайграў. Да гэтага гранітаўцы дома перайгралі «Белкард» 2:1, згулялі 1:1 са «Слуцкам», а таксама разграмілі ў гасцях мінскі РГУАР 4:0.

U17

Каманда Марата Белезяка ўстойліва перанесла крыўдную паразу ад «Мінска» і выдала два пераможных матчу з вельмі моцнымі супернікамі. Чацвёртага верасня дзякуючы голу Андрэя Трюхана на выезде быў абыграны моцны салігорскі «Шахцёр». Нягледзячы на тое, што ў мінулым сезоне гэты ўзрост два разы салігорскім хлопцам прайграў (дома 0:3, у гасцях 2:5), гаспадары не панесліся зламаючы галаву на браму гродзенцаў. Пабойваліся нашых хлопцаў яны не дарма. Да перапынку матч праходзіў у роўнай барацьбе, а на зыходзе першага тайма жоўта-зялёным атрымаўся галявы выпад. Вашкевіч на левым фланзе абыграў двух супернікаў і відушчымі пакаціў уздоўж брамы. Трюхану заставалася толькі накіраваць мяч міма брамніка, што і было бездакорна выканана. Другі тайм быў за гаспадарамі. Гродзенцы свядома аддалі ініцыятыву і спрабавалі злавіць гаспадароў на контратацы. Варта адзначыць, што часам каля брамы Орсіка было спякотна, аднак на гэты раз фартуна спрыяла і нёманцы павезлі з Салігорску тры ачкі.

Праз шэсць дзён дома был пераможаны мінский РГУАР, на базе якога сабраны лепшыя гульцы 2001 года нараджэння. Гродзенцы добра правялі пачатак сустрэчы, і да зыходу 32-й хвіліны ўжо вялі ў два мячы - вызначыліся Данііл Копач і Дзмітрый Вашкевіч, аднак яшчэ да перапынку зборнікі адзін мяч адыгралі. Пасля перапынку нічога асабліва не змянілася. Гаспадары ўпэўнена кантралявалі ход матчу і пасля падачы з кутавога забілі трэці мяч. Маркевіч выканаў падачу, а Асмалоўскі галавой забіў мяч у сетку. Здавалася, што лёгкі фінал забяспечаны, аднак гэта было не так. Раздражнёныя госці ўключылі падвышаную хуткасць і стварылі два стоадсоткавых моманта. Абодва выхаду адзін на адзін былі зайграны, а нападнікі да удараў справу не давялі. Тым не менш, другі мяч зборнікі ўсё ж забілі. Клунок быў вымушаны фаліць ў штрафной і зарабіў адзінаццаціметровы ўдар, які выразна рэалізаваў Згурскі. выніковы лік 3:2 на карысць гродзенскай дружыны. У мінулым годзе абодва матчы гэтых супернікаў скончыліся баявымі нічыімі - 2:2 і 3:3.

Падапечныя Белезяко пасля трох матчаў з шасцю ачкамі займаюць чацвёртае месца. Наступны матч каманда правядзе на выездзе. 19 верасня нашы хлопцы згуляюць з мінскім РЦАР (індывідуальная статыстыка гульцоў і каляндар каманды ў закладцы «статыстыка»).

U19

Што атрымалася ў малодшых узростаў, старэйшым зрабіць не ўдалося. У двух самых складаных матчах супраць тых жа салігарчанаў і мінчан было набрана толькі адно ачко. Прычым у абодвух сустрэчах каманда Белавы паказала заможны футбол, камбінацыйны, з багаццем магчымасцяў забіць. Гродзенцы гуляюць у высокі прэсінг, прымушаюць гульцоў абароны суперніка шмат памыляцца, аднак самі ж сапсуюць створанае.

У матчы супраць «Шахцёра» (пратакол сустрэчы) жоўта-зялёныя вельмі хутка апынуліся ў ролі даганяючых, прапусціўшы мяч ужо на другой хвіліне сустрэчы. Забіўшы хуткі гол гаспадары не супакоіліся і працягвалі магутна прэсінгаваць. У выніку каманда Кіпры дамаглася свайго і павялічыла разрыў у рахунку. Абодва галы салігорскай каманды былі падобныя як дзве кроплі вады: два нашых цэнтральных абаронцы няўдала ішлі ў адбор і абодва разы дазволілі аднаму з гульцоў суперніка выйсці адзін на адзін з брамнікам. Тым не менш, фінал тайма быў цалкам за гродзенцамі, аднак Беценя двойчы не змог перайграць брамніка гаспадароў, апынуўшыся з тым сам-насам. Спалохаўшыся такога напору, гаспадары пасля перапынку адкаціліся ў глухую абарону, прапанаваўшы жоўта-зялёным згуляць першым нумарам. Колькі ні спрабавала наша каманда, але ўзламаць эшаланаваную абарону «Шахцёра» так і не ўдалося.

У супрацьстаянні з срэбным прызёрам мінулага першынства свайго ўзросту была абраная тактыка ад абароны, па магчымасці, з высокім прэсінгам. У мінулым сезоне гэта прынесла поспех: дома ргуораўцы былі абыграны з лікам 2:1. Варта адзначыць, што на вядучых ролях у камандзе зборнікаў тры гродзенца - Раман Вягера, Яўген Сакута і Максім Мякіш.

Апошні з'яўляецца капітанам мінскай каманды. Прайграўшы стартавы адрэзак сустрэчы, гродзенцы да 15-й хвіліны выраўнялі гульню і правялі некалькі небяспечных нападаў. Аднак у цэнтры поля перавага было за РГУАР, падбор часта прайграваўся, а выхад з абароны ў атаку атрымліваўся не гэтак імклівым і небяспечным, як бы гэтага хацелася.

Перабудаваць пасля перапынку на гульню ў два апорніка (4-2-3-1), гродзенцы часткова гэтае пытанне вырашылі, што дало магчымасць амаль 20 хвілін другой паловы сустрэчы дамінаваць і ствараць небяспечныя моманты. Аднак, як часта гэта бывае, адна недарэчная памылка перакрэслівае ўсе старанні. Пасля аднаго з кутавых госці разыгралі перад лініяй штрафной мяч і вывелі на ўдарную пазіцыю Вегеру, які хлёсткім ударам адправіў мяч нізам у дальні правы ад брамніка кут брамы.

Радаваліся госці не доўга. Літаральна праз некалькі хвілін Лех са штрафнога зраўняў лік, паслаўшы мяч па-над сценкі ў верхні кут - 1:1.

Далей у гродзенцаў здарыліся некалькі вымушаных замен, што пайшло яўна не на карысць гульні каманды. Гаспадары нізка селі ў абарону і дазволілі менчукам ствараць небяспеку каля сваёй брамы. За чатыры хвіліны да канца асноўнага часу нашы ў чарговы раз абрэзаліся ў цэнтры поля, пайшоў пераклад на левы край атакі, Усовіч не паспеў да мяча і высек у штрафной суперніка - відавочна пенальці. Добра, што з ударам капітана мінчан на выдатна справіўся наш галкіпер Ігар Калядэнка, намёртва зафіксаваў мяч.

Пасля трох сустрэч у гродзенцаў чатыры набраныя ачкі і пяты радок у турнірнай табліцы. Пасля срэбранага прызёра мінулага сезону хломцаў у госці чакае чэмпіён. 19 верасня гуляем на выездзе з РЦАРам (індывідуальная статыстыка гульцоў і каляндар каманды ў закладцы «статыстыка»). Будзе горача!