Па гарачых слядах Вярнуцца да спісу
Ян СЕНКЕВІЧ (паўабаронца «Нёмана»):
— Двойчы выходзілі наперад, але так і не ўтрымалі перавагі. Як думаеш, чаму?
— Складанае пытанне. Думаю, што ў каманды моцна абнавіўся склад, многім не хапае вопыту. Можна было б сесці ніжэй і згуляць спакайней. Мы ж па інэрцыі ішлі ў атаку.
— У трох гульнях не з самымі моцнымі супернікамі толькі адна перамога. Як лічыш, гэта нармальна ці мала для нашай новай каманды?
— Гэта не нармальна. Нават для абноўленай каманды, я лічу, гэта мала. Мы павінны былі перамагаць ва ўсіх трох сустрэчах. Думаю, што ад гульні да гульні будзем дадаваць. А на старце сезона пакуль маем тое, што маем. У нас у мінулых сезонах быў больш атакуючы стыль гульні.
— Адчуваецца недахоп хлопцаў?
— Была б каманда мінулага года — у нас было б 9 ачкоў. Я ў гэтым ніколькі не сумняваюся.
Дзмітрый ТРОСКА (галоўны трэнер дублюючага складу «Нёмана»):
— Матч сёння выдаўся цяжкім. Па ходзе матчу мы два разы выходзілі наперад, але супернік нас даганяў. Добры супернік, які не саступіў нам у руху, а ў адзінаборствах нават перасягнуў. Хлопцы практычна ўсе аднолькавага ўзросту і практычна ўсё магутней нашых гульцоў — вышэй, буйней. Футбол складаецца з міні-адзінаборстваў і мы ў гэтым «Віцебску» прайгралі.
— Два разы хутка прапусцілі пасля забітых мячоў. Такое развіццё падзей — гэта следства чаго?
— Гэта маладосць і неспрактыкаванасць лініі абароны. Папярэдне прааналізавалі гэтыя эпізоды. Там трэба было згуляць спакайней, патрымаць мяч. Мы называем такія дзеянні — памылкі маладосці. І над гэтым трэба яшчэ шмат працаваць. Гэта прыходзіць з вопытам.
— Нягледзячы на антрапаметрыю суперніка ў нас было дастаткова момантаў, каб схіліць вагі на сваю карысць.
— У такіх зацятых гульнях момантаў можа быць няшмат. Супернік проста не дазваляе іх ствараць. Тыя каманды, якія марнатраўна да іх ставяцца, наўрад ці могуць разлічваць на перамогу. Таму берагчы кожны эпізод і максімальна рэалізоўваць свае небяспечныя моманты — тады прыйдуць перамогі. У нас было два выдатных шанцу ў другім тайме. Не рэалізавалі выхад два ў адзін, а ў канцоўцы матча не забіў Буцько, пасля добрай перадачы Чайкі. У гэтым эпізодзе яму не хапіла выканальніцкага майстэрства. Каб радаваць сваіх заўзятараў перамогамі нам давядзецца яшчэ шмат працаваць. Працаваць, працаваць і яшчэ раз працаваць...