Гісторыя

Зараджэнне дзіцяча-юнацкага футболу ў Гродне звязана з дзейнасцю абласной Дзіцячай спартыўнай школы (ДСШ). Як самастойнае аддзяленне футболу Дзіцяча-юнацкая спартыўная школа (ДЮСШ) была ўтворана ў верасні 1975 года загадам абласнога аддзела народнай адукацыі (аблана). На пачатковым этапе ў школе працавала ўсяго чатыры спецыялісты, а першым дырэктарам навучальнай установы стаў славуты футбаліст гродзенскага футбольнага клуба Іван Ляцяга.

Першапачаткова школа не мела ні працоўнага кабінета, ні пастаяннага месца для трэніровак будучых футбалістаў. Заняткі праходзілі на стадыёнах розных школ горада, а таксама на трэніровачным полі асноўнай каманды «Нёман». Аднак праз пару месяцаў школа атрымала два пакоі ў будынку дзіцячай музычнай школы на скрыжаванні вуліц Гарнавых і Савецкіх пагранічнікаў.

У 1984-м будынак школы знаходзіўся ў парку «40 гадоў ВЛКСМ» (цяпер – Каложскі парк), а трэніроўкі праходзілі на апілкавай паляне парку. Сёння гэты будынак выкарыстоўваецца пад жыллё служыцелямі Каложскай царквы. У 1985 годзе быў здадзены ў эксплуатацыю будынак каля дзіцячага стадыёна «Юнацтва», у якім знаходзіцца школа ў цяперашні час (г. Гродна, вул. Лермантава, 45). У гэтым будынку тады для школы выдзелілі ўсяго адзін пакой.

У сувязі з запрашэннем двух выхаванцаў школы ў юнацкую зборную СССР (Сяргей Гурэнка і Анатоль Драчылоўскі) гродзенскай ДЮСШ-6 у 1987 годзе была прысвоена назва СДЮШАР-6 (спецыялізаваная дзіцяча-юнацкая школа алімпійскага рэзерву), а саму школу перавялі пад кіраўніцтва аддзела адукацыі Кастрычніцкага раёна . Гэты статус быў паспяхова пацверджаны праз 5 гадоў, у 1992 годзе, калі ў розныя зборныя ўжо Беларусі запрашаліся Віталь Надзіеўскі, Сяргей Гурэнка і Максім Бардачоў.

У 1993 годзе школа адышла пад кіраўніцтва гарадскога аддзела народнай адукацыі, а з 1999 па 2005 гады СДЮШАР-6 знаходзілася пад кіраўніцтвам аддзела адукацыі адміністрацыі Ленінскага раёна. З 2005 па 2009 гады футбольная школа перайшла пад кіраўніцтва ўпраўлення па фізічнай культуры, спорту і турызму гродзенскага выканаўчага камітэта і стала называцца НСУ (навучальна-спартыўная ўстанова) ГСДЮШАР-6 па футболе.

Футбольны клуб «Нёман» у 2004 годзе заключыў са школай дамову, згодна з якой яна павінна была рэпрэзентаваць клуб на юнацкіх рэспубліканскіх спаборніцтвах. З 2009 года і па цяперашні час школа знаходзіцца пад кіраўніцтвам клуба і носіць назву СДЮШАР па футболе СУ ГФК «Нёман».

КІРАЎНІКІ

  • ЛЯЦЯГА Іван Яфімавіч (верасень 1975 – 20 лістапада 1979)
  • ФЁДАРАЎ Юрый Іванавіч (в.а., 21 лістапада 1979 – 21 жніўня 1981)
  • ЛЯЦЯГА Іван Яфімавіч (22 жніўня 1981– 20 студзеня 1983)
  • ЕМЯЛЬЯНЧЫК Юрый Міхайлавіч (1984–1987)
  • МАКАЕЎ Мікалай Венедиктович (в.а., 1988–1989)
  • НОВІКАЎ Анатоль Аркадзьевіч (1989–1996)
  • БАЛУХА Аляксандр Уладзіміравіч (в.а., 1996–1997)
  • НАДЗІЕЎСКІ Аляксандр Аляксандравіч (1997–1997)
  • БАЛУХА Аляксандр Уладзіміравіч (в.а ., 2011–2013, 2013 – па цяперашні час)