Дакладна! Няправільна!

Свой самы першы афіцыйны матч зборная Беларусі правяла 28 кастрычніка 1992 года ў Мінску супраць зборнай Украіны. Галоўны трэнер зборнай Міхаіл Нічыпаравіч Вергеенка выклікаў на гэты матч 19 гульцоў, адным з якіх быў прадстаўнік гродзенскага «Хіміка» 20-гадовы абаронца Сяргей Гурэнка.

У стартавым складзе на поле выйшлі сем гульцоў мінскага «Дынама»: Тайкоў, Лясун, Арлоўскі, Зыгмантовіч, Антановіч, Герасімец і Вялічка; адзін гулец віцебскага КІМа – Дземенкавец, а таксама тры прадстаўнікі замежных чэмпіянатаў: Шанталосаў («Лакаматыў» Ніжні Ноўгарад, Расія) , Мятліцкі («Рапід» Вена, Аўстрыя) і Алейнікаў («Лечэ» Лечэ, Італія). У другім тайме на замену выйшлі двое сталічных дынамаўцаў Гоцманаў і Бялькевіч, а таксама гулец бабруйскага «Трактара» Кукар.

Дэбют Сяргея Гурэнкі адбыўся толькі праз два гады, у матчы супраць той жа зборнай Украіны на кіеўскім Рэспубліканскім стадыёне. 25 кастрычніка 1994 года Гурэнка на 70-й хвіліне матчу замяніў Андрэя Хрыпача, тым самым стаўшы першым з гарадзенцаў, хто згуляў за нацыянальную зборную Беларусі ў афіцыйных матчах.

Ураджэнец горада Гродна прыцягваўся ў першую каманду краіны на працягу ўсёй сваёй футбольнай кар’еры, па першым клічы прыбываючы ў месца размяшчэння зборнай з маскоўскага «Лакаматыва», італьянскіх «Ромы», «Пармы» і «П’ячэнцы», з іспанскай «Сарагосы». Усяго за 12 сезонаў абаронца правёў 80 матчаў у складзе нацыянальнай каманды, апошні раз адзеўшы майку зборнай Беларусі 11 кастрычніка 2006 года ў матчы супраць зборнай Славеніі.