Па выніках чэмпіянату 1967 года гродзенскі «Нёман» змог пакінуць клас «Б» і перайсці рангам вышэй. Каманда стала другой у першай зоне РСФСР, саступіўшы першае месца толькі па розніцы забітых і прапушчаных мячоў дынамаўцам з Бранска. Тады менавіта гэты паказчык быў галоўным, інакш першынствавала б наша каманда, якая перамагла «Дынама» двойчы з лікам 2:1. Але і другое месца дало магчымасць пазмагацца за месца ў другой групе класа «А» ў фінальным турніры для наймацнейшых каманд розных зон класа «Б».

У паўфінальнай «пульцы» гарадзенцы перайгралі «Лоры» з Кіравакана, «Дзілу» з Горы і мінгечаурскі «Тэкстыльшчык». У фінале ж быў пераможаны сумгаіцкі «Палад».