Арцём Канцавы падпісаў кантракт Вярнуцца да спісу
Нападнік Арцём Канцавы працягне абараняць жоўта-зялёныя колеры нашага клуба. Новы кантракт разлічаны да канца гэтага сезона.
Выхаванец гомельскага футбола будзе выступаць за гродзенскі клуб трэці сезон запар. За два гады праведзеных у «Нёмане» Канцавы згуляў 40 афіцыйных матчаў, у якіх вызначыўся 7 разоў. Пяць мячоў нападнік правёў у рамках чэмпіянату краіны, 2 галы забіў у матчах Кубка Беларусі.
Першыя крокі ў прафесійным футболе рабіў у мінскім РУАРы, аднак вельмі хутка перайшоў у барысаўскі БАТЭ. Пасля двух паспяховых сезонаў у складзе барысаўчан нападнік перабраўся ў маскоўскі «Спартак». Замацавацца ў складзе чырвона-белых Арцёму не атрымалася, тым не менш, Расію Канцавы не пакінуў, адыграўшы яшчэ адзін сезон у новарасійскім «Чарнаморцы». Пасля двух сезонаў праведзеных у расійскім чэмпіянаце, Арцём вярнуўся ў Беларусь. Наступным клубам у яго кар'еры стаў мінскі МТЗ-РІПА, у якім ён правёў 4 сезону, двойчы станавіўся ўладальнікам Кубка Беларусі (2005, 2008) і двойчы бронзавым прызёрам чэмпіянату краіны. У 2009 годзе Канцавы зноў адправіўся ў Расію, на гэты раз у нальчынскі «Спартак». У пачатку 2010 года на правах арэнды перайшоў у барысаўскі БАТЭ, а ў снежні гэтага ж года правы на футбаліста барысаўчане выкупілі цалкам. За час выступлення ў БАТЭ Канцавы 5 разоў станавіўся чэмпіёнам Беларусі (2002, 2010, 2011, 2012, 2013), станавіўся ўладальнікам Кубка Беларусі (2010), а таксама двойчы ўладальнікам Суперкубка краіны (2010, 2013). Па заканчэнні сезона 2013 гады пакінуў табар чэмпіёна і перабраўся ў жодзінскі клуб «Тарпеда-БелАЗ». У гродзенскі «Нёман» перайшоў у ліпені 2015 года.
Усяго на рахунку Арцёма Канцавога ў Вышэйшай Лізе чэмпіянату Беларусі згуляна 299 матчаў, забіта 75 галоў. Свой юбілейны трохсоты матч у чэмпіянатах краіны правядзе ў майцы нашага клуба.
Падрабязная інфармацыя аб нашым гульцу ў любы момант даступная ў раздзеле ЖЗЛ. Жоўта-зялёныя людзі: Арцём Канцавы.
Багатага на галы сезона, Арцём!
