Нёманскае дэрбі Вярнуцца да спісу
У Мінску адбылося лёсаванне 1/16 Кубка Беларусі, паводле вынікаў якой нашаму клубу трэба будзе згуляць у Стоўбцах супраць мясцовага клуба «Нёман-Агра».
Стаўбцоўскі клуб толькі ў гэтым сезоне вярнуўся ў Другую Лігу пасля доўгай адсутнасці. Адразу пасля развалу СССР «Нёман» быў вызначаны ў другі беларускі дывізіён, аднак затрымаўся там толькі на 2 сезону. У сезоне 1993/94 года Стаўбцоўская каманда заняла ў трэцім дывізіёне 15-е месца з 18-ці ўдзельнікаў і па ўласнай волі ў першы раз пайшла з рэспубліканскіх футбольных радараў. Другі прыход у вялікі футбол быў такім жа па працягласці. Стаўбцоўская каманда адыграла два сезону пад старой шыльдай «Нёман», а потым яшчэ адзін сезон пад назвай «Дарыда-Белагра». Пасля гэтых трох сезонаў каманда на доўгіх 16 гадоў апусцілася дывізіёнам ніжэй і выступала ў чэмпіянаце Мінскай вобласці, двойчы стаўшы чэмпіёнам гэтага спаборніцтвы (2010, 2011). Перад стартам цяперашняга сезону Стаўбцоўская каманда ў трэці раз вырашыла вярнуцца і паспрабаваць футбольнага шчасця на рэспубліканскім узроўні.
Заўсёды і ўсюды, усё трымаецца на адданых сваёй справе людзях. Так і ў Стоўбцах, галоўным натхняльнікам каманды на футбольныя подзвігі стаў Андрэй Іванавіч Мікалаевіч, які сам на світанку суверэннай футбола абараняў колеры гэтага клуба. Зараз Андрэй Іванавіч з'яўляецца старшынёй клуба і галоўны трэнерам «Нёман-Агра» адначасова. Вопыт стварэння дыхтоўнай футбольнай каманды ў Мікалаевіча ёсць. Пад яго кіраўніцтвам зараджалася цяперашняя «Гарадзея». Стаўшы галоўным трэнерам каманды ў 2006 годзе, Мікалаевіч за 5 гадоў вывеў пасялковую каманду ў Першую Лігу Беларусі. Пасля гарадзейскага перыяду трэнер вярнуўся ў Стоўбцы, марачы нешта падобнае паўтарыць і з «Нёманам». Другая Ліга ўжо расчыніла дзверы перад стаўбцкоўскай дружынай. Пасля чатырох згуляных камандай матчаў на яе рахунку 7 ачкоў і шостае месца ў турнірнай табліцы.
— Нам вядома ж вельмі прыемна прыняць у Стоўбцах каманду з такімі багатымі традыцыямі, як гарадзенскі «Нёман», — сказаў Мікалаевіч. Думаю, што для нашага горада гэта будзе выдатнае футбольнае свята. Нягледзячы на тое, што ў вашай каманды цяпер спад, для маёй каманды гэта будзе вельмі сур'ёзнае выпрабаванне, а многім хлопцам ўрок футбола на ўсё жыццё. Будзе што потым дзецям расказаць. Гродзенская футбольная школа заўсёды была вельмі высокага ўзроўню і таму я думаю, што ў вас усё будзе нармальна і вы аберацеся з гэтага няпростага становішча. Чаго вам і жадаю. Ведаю многіх былых гродзенскіх футбалістаў, у добрых адносінах з вашым галоўным трэнерам. Заўсёды меў сымпатыю да вашага гораду і вашай камандзе. А як можа быць інакш, калі і вы і мы — «Нёман». Толькі мы з прыстаўкай. У нас тут Нёман бярэ свой пачатак, у вас праз Гародню цячэ шырокай прыгожай ракой. Калі што, то па рэчцы заўсёды можна дабрацца да нас (смяецца).
Застаецца дадаць, што раней нашы каманды ні разу не сустракаліся. Стаўбцоўскі «Нёман-Агра» стане 38-м нашым супернікам у гэтым турніры. Дакладная дата правядзення матчу пакуль не ўзгоднена. Вядома толькі тое, што матчы гэтай стадыі павінны адбыцца з 8 па 10 ліпеня.
