Віншуем усіх беларусаў з Днём роднай мовы! Вярнуцца да спісу
«Не пакідайце ж мовы нашай беларускай, каб не ўмёрлі! Пазнаюць людзей ці па гаворцы, ці па адзежы, хто якую носе, — піша ў прадмове да "Дудкі беларускай" Францішак Багушэвіч, — ото ж гаворка, язык і ёсць адзежа душы».
Cёння ва ўсім свеце святкуецца Міжнародны дзень матчынай мовы, які, дзякуючы прадстаўнікам Бангладэш, быў прыняты рашэннем 30-й сесіі ЮНЕСКА ў лістападзе 1999 года.
Дата святкавання выбрана не выпадкова. 21 лютага 1952 года ў тагачасным Пакістане загінулі пяцёра студэнтаў, якія змагаліся за тое, каб мець магчымасць навучацца на роднай мове бангла, а таксама за наданне ёй статусу дзяржаўнай. На жаль, хлопцы загінулі, але пазней усходняя частка Пакістана стала незалежнай дзяржавай і зараз носіць назву Бангладэш…
З больш як 6 500 моваў, на якіх размаўляе ўсё насельніцтва Зямлі, каля 5 000 – пад пагрозай знікнення ў бліжэйшае стагоддзе. Былі складаныя перыяды і для нашай беларускай мовы. Тым не менш, дзякуючы лепшым сынам сваёй радзімы, яна вытрымала і крочыць далей, квітнее і ўсё больш становіцца папулярнай сярод моладзі.
Футбольны клуб «Нёман» віншуе ўсіх беларусаў з Днём роднай мовы! Чытайце і размаўляйце па-беларуску. Валоданне нацыянальнай мовай – адзін з паказчыкаў культуры чалавека. Шануйце тое, што засталося ад дзядоў, вывучайце, каб не згубіць і мець магчымасць перадаць словы роднай мовы сваім дзецям, унукам і будучым беларусам.
Няма народа без мовы, а мовы няма без яго носьбіта. Са святам, беларусы!
А гэта наш падарунак беларускамоўным заўзятарам нашага клуба. Цяпер мы будзем даступныя для вас і на роднай мове! Працэс абрастання артыкуламі і нататкамі не хуткі, тым не менш вектар развіцця абраны. Заходзьце, калі ласка!
