Мы шукаем таленты Вярнуцца да спісу

У сувязі з уводам у эксплуатацыю інтэрната СДзЮШАР «Нёман» для перспектыўных іншагародніх хлопцаў, які разлічаны на 27 чалавек, сёння стартуе папярэдні адбор будучых футбалістаў Гродзенскай вобласці 2006 года нараджэння і больш старэйшых.

Першым горадам, у якім пройдзе пошук таленавітых хлапчукоў, стане Слонім, куды сёння адправіліся нашыя прадстаўнікі - трэнер па навукова-метадычнай працы Ігар Латаш, начальнік аддзела дзіцяча-юнацкага футбола Віталь Надзіеўскі і намеснік старшыні футбольнага клуба Дзмітрый Кавалёнак. У бліжэйшых планах наведванне яшчэ двух гарадоў вобласці. 9 чэрвеня наша група наведае Ліду, а 11 чэрвеня адправіцца ў Смаргонь.

Усе таленавітыя хлопцы атрымаюць запрашэнне на фінальны адбор, які пройдзе ў Гродне ў жніўні. Лепшыя з лепшых, якія пройдуць поўнае медыцынскае абследаванне, працягнуць спасцігаць футбольную навуку ў Гродне. Агульнаадукацыйнае навучанне дзяцей будзе ажыццяўляцца на базе ДУА «Сярэдняя школа №2 горада Гродна».