Анонс матча з «Дынама» Вярнуцца да спісу

НЁМАН – ДЫНАМА-МІНСК

Пасля 18-га тура гродзенскі «Нёман», дзякуючы выязной перамозе над «Слуцкам», выйшаў на чыстае чацвёртае месца. У прынцыповым матчы з суседам па турнірнай табліцы гродзенцы паказалі годны футбол, што дазваляе з добрым настроем рыхтавацца да наступнага важнага матчу. 

Ужо ў гэтую нядзелю ў Гродне адбудзецца матч 19-га тура чэмпіянату, у якім наша каманда паспрабуе адабраць ачкі ў аднаго з лідэраў нашага чэмпіянату мінскага «Дынама». Гэты матч стане сапраўдным упрыгожваннем гэтага тура. Мінскія дынамаўцы па турнірнай дыстанцыі ідуць роўна і цалкам справядліва займаюць перад гродзенскім матчам другое месца ў табліцы. Сталічная каманда адстае ад салігорскага «Шахцёра» усяго на тры ачкі, апярэджваючы БАТЭ, які ідзе на трэцяй пазіцыі, на адзін бал. Гродзенцы, у сваю чаргу, пераследуюць тройку лідараў і зусім не супраць папсаваць прэтэндэнтам на медалі нервы. У выпадку перамогі жоўта-зялёныя яшчэ больш наблізяцца да трэцяга месца, што дасць надзею на ўключэнне ў барацьбу за прызавыя месцы. 

Яшчэ большы каларыт надае гэтаму матчу той факт, што ўзначальвае мінскі клуб самы тытулаваны гродзенскі футбаліст Сяргей Гурэнка. Гадаванец нашай футбольнай школы, які выступаў у пачатку сваёй футбольнай кар'еры за гродзенскі «Хімік», меў паспяховую кар'еру, пагуляўшы ў Расіі, Іспаніі і Італіі. Супрацьстаяць яму будзе Кавалевіч, які з'яўляецца не менш значнай фігурай для гродзенскага клуба. Капітан срэбнага «Нёмана» 2002 года настройвае сваю каманду на барацьбу ў гэтым сезоне за самыя высокія месцы. 

Несумненна, што абедзве каманды ў гэтым матчы задаволіць толькі перамога. «Дынама» ідзе за лідэрам, а «Нёман» пераследуе лідзіруючую тройку. Прыгожы футбол і бескампрамісная барацьба - гэта тое, што трэба любому заўзятару. Менавіта гэта і атрымаюць аматары футбола, якія прыйдуць на гэты матч. 

У гэтым сезоне гарадзенцы працягваюць перамагаць. На сённяшні дзень на рахунку жоўта-зялёных 11 перамог у 20 афіцыйных матчах. Хочацца, каб перамог у каманды стала больш ужо ў гэту нядзелю. Аднак без падтрымкі трыбун гэта будзе зрабіць значна складаней. 

ФУД-КОРТ, ФАН-ЗОНА І ФУТБОЛ

Прыходзьце на стадыён са сваімі сем'ямі загадзя. Ужо ў 14:00 для ўсіх жадаючых адкрыецца футбольная Фан-зона, дзе дарослыя змогуць паспаборнічаць са сваімі дзецьмі ў дакладнасці і ўменні працы з мячом, згуляць у ўпадабаным многім турніры «Тата і сын». Побач са стадыёнам будуць адкрыты некалькі кропак харчавання назавем гэта па моднаму Фуд-корт, дзе заўзятары змогуць смачна абмеркаваць справы каманды і бліжэйшы матч супраць «Дынама». 

Ну, а потым каманды чакаюць усіх на стадыёне, дзе ў 16:15 прагучыць стартавы свісток суддзі і пачнецца чарговы матч чэмпіянату Беларусі паміж гродзенскім «Нёманам» і мінскім «Дынама». Каб адолець суперніка і наблізіцца да нашай агульнай мары, камандзе патрэбны вашы гучныя галасы, вашы неверагодныя эмоцыі, ваша магутная энергія! Прыходзьце, на футбол будзе цікава! 

ДЗЕ КУПІЦЬ КВІТОК

16 жніўня стартаваў продаж квіткоў на матч з мінскім «Дынама». З серады па пятніцу квіткі можна набыць на прахадной офіснага будынка стадыёна, з 8:00 да 20:00. У выхадныя квіток на матч можна будзе купіць у цэнтральных касах стадыёна. У суботу каса на ўваходзе на стадыён адкрыецца ў 12:00 і будзе працаваць да 20:00, а ў дзень гульні продаж пачнецца з 10:00. 

Кошт квіткоў: ад 1,5 да 4 рублёў. (падрабязна тут).