На жаль, толькі нічыя Вярнуцца да спісу

Сёння ў Мінску моладзевая зборная Беларусі не змагла перайграць аднагодкаў з Галандыі і задаволілася толькі нічыёй.

На перапынак падапечныя Ігара Кавалевіча сышлі маючы перавагу ў адзін мяч. Беларусы выйшлі наперад дзякуючы адзінаццаціметроваму, які быў прызначаны на зыходзе 17-й хвіліны сустрэчы. Гаспадары ўвялі мяч з-за бакавой закінуўшы мяч у штрафную, Цевераў паспрабаваў прабіць праз сябе, але мяч адскочыў убок Яроцкага. Гродзенец пазмагаўся за мяч і вымусіў галандца сфаліць.

Пенальці лёгка рэалізаваў іншы прадстаўнік нашага клуба Павел Савіцкі, які вывеў маладзёжку на гэты матч з капітанскай павязкай. Аднак самае цікавае заўзятараў чакала наперадзе.

Пасля перапынку галандцы сталі дзейнічаць першым нумарам і перасунулі гульню бліжэй да штрафной Васілючака. Так працягвалася да таго часу, пакуль госці ня зраўнялі лік. Рослы Эль-Газі ў паміж трох абаронцаў змог дакладна прабіць галавой у правы ад брамніка кут брамы - 1:1.

Праз дзясятак хвілін каманды зноў абмяняліся галамі. Беларусам атрымалася ў другі раз выйсці наперад. Эль-Газі метрах у дзесяці ад цэнтральнай лініі заваліў Пазняка, Еўдакімаў падаў у штрафную, Аке галавой зрэзаў мяч да брамы, дзе Барысаў у подкаце праштурхнуў мяч міма галандскага брамніка прама на Савіцкага - 2:1.

Паша расстрэльваў ужо пустую браму моладзевай зборнай Нідэрландаў! Засвяцілася надзея на перамогу, аднак яна вельмі хутка знікла. Ужо праз тры хвіліны нашы хлопцы зноў прайгралі ў сваёй штрафной. Пасля падачы кутавога Хатебург з адзінаццаці метраў галавой прабіў у бок брамы, куды бёг Люккассен. Другі нумар гасцей падставіў пад мяч галаву і пераправіў яго ў сетку брамы Васілючака - 2:2.

Заключны адрэзак матчу стаў самым насычаным на галявыя моманты. Адразу ж пасля прапушчанага мяча беларусы ізноў перайшлі да наступу і правялі вельмі добры адрэзак. Госці былі прыціснутыя да сваёй брамы, фолілі і не цураліся простых вынасаў. Так, пасля чарговага парушэнні правілаў, Савіцкі прабіў сапраўды над сценкай і трапіў у кут брамы Ван дэр Харта, які ў прыгожым скачку дастаў мяч, пераклаўшы яго на кутавы. Літаральна праз некалькі хвілін Савіцкі пяткай скаціў пад удар Золатава - зноў галкіпер бліскуча у падзенні дацягнуўся да мяча... Дасталася хвілінка славы і Васілючаку, якому на першай дададзенай хвіліне сустрэчы прыйшлося кінуцца ў ногі Эль-Газі і выратаваць браму беларусаў ад немінучага гола. А калі ішла ўжо апошняя з чатырох дададзеных арбітрам хвілін, Савіцкі паспрабаваў з другой спробы рэалізаваць перспектыўны штрафны ўдар. Шкада, але на гэты раз мяч размінуўся з рамкай брамы.

ПРАТАКОЛ

БЕЛАРУСЬ U-21 — НІДЭРЛАНДЫ U-21 – 2 : 2 (1 : 0)
Адборачны матч моладзевага Чэмпіянату Еўропы U-21. Група "-".
Пятніца, 2 верасня 2016 года. МІНСК — Стадыён ФК "Мінск" (умяшчальнасць – 3 000). __ гледачоў. Пачатак матча – 18:15 (час мясцовы).
+19 °С, у пачатку матчу невялікі дождж / электраасвятленне з ___ хвіліны. Квіток — __ беларускіх рубля.

Галоўны суддзя – Аліяр Агаеў, памочнікі суддзі – Зейнал Зейналаў і Рза Маммадаў, рэзервовы суддзя – Орхан Маммадаў (усе – Азербайджан). Інспектар сустрэчы – Эльмір Пілаў (Боснія і Герцагавіна), дэлегат УЕФА – Генадзій Скуртуль (Малдова).

БЕЛАРУСЬ: 1.Васілючак У. – 6.Золатаў М., 16.Барысаў Д., 4.Шасцілоўскі С., 20.Пазняк А. – 9.Корзун М. (2.Залескі А., 71), 17.Бабічаў М. - (к) 8.Савіцкі П., 15.Клімовіч У. (18.Бярозкін Я., 75), 11.Яроцкі Я. (14.Еўдакімаў А., 54) – 10.Цевераў Р. Запасныя гульцы: 12.Чічкан А. – 2.Залескі, 7.Янчанка А., 7.Назаранка П., 19.Байдук Д. Галоўны трэнер – Ігар Кавалевіч.
НІДЭРЛАНДЫ: 1.ван дэр Харт М. – 2.Хатебур Х., (к) 4.Рекік К., 3.Люккассен Д, 5.Аке Н. – 6.Рідэвалд Дж., 10.Рамселаар Б., 8.дэ Вільена Т. - 9.Эль-Газі А., 11.Кішна Р., 7.Боэціюс Ж.-П. (18.Фермей В., 62). Запасныя гульцы: 16.Юрьюс Х. – 12.Бренет Дж., 13.Худт В., 14.ван Офереем Й., 15.Фосу-Менса Т., 17.Меніг К. Галоўны трэнер – Фред Грім.

Галы: 1:0 — П.Савіцкі (18, з пенальці за фол Ж.-П.Боэціюса супраць Я.Яроцкага), 1:1 — А.Эль-Газі (69-г, пас – Р.Кішна), 2:1 — П.Савіцкі (76, пас – Д.Барысаў), 2:2 — Д.Люккассен (78-г, пас – Х.Хатебур).

Папярэджанне: М.Корзун (45+1, грубая гульня), М.Золатаў (73, затрымка суперніка рукамі), Р.Цевераў (77, грубая гульня), Т.Вільена (82, грубая гульня), Н.Аке (89, неспартовыя паводзіны - вяртанне на поле без дазволу арбітра), К.Рекік (90+3, грубая гульня).

Выдаленні: няма.

Ігар КАВАЛЕВІЧ (галоўны трэнер моладзевай зборнай Беларусі):

— Нам супрацьстаяла каманда з добрым падборам гульцоў. Правялі добры матч, але не ўдалося дамагчыся перамогі. Усё, што магу сказаць.

— Як ацэніце шанцы на другое месца?

— Трэба глядзець табліцу, нам засталося правесці дзве гульні. Калі набяром шэсць ачкоў, то шанцы будуць. Сёння, на жаль, нам не ўдалося дамагчыся перамогі.

— Ці задаволеныя утрыманнем гульні ў выкананні сваіх падапечных​?

— Гульня разбілася на адрэзкі, у прынцыпе, утрыманнем задаволены, улічваючы ўсе нашы кадравыя праблемы: не хапіла Жэні Яблонскага, вымушаныя былі замяніць Корзунам.

АГЛЯД