З візітам у адказ Вярнуцца да спісу

Жоўта-зялёныя на выездзе сёння правядуць таварыскі матч з вільнюскім «Жальгірысам». Гульня пройдзе на сталічным стадыёне «ЛФФ», пачатак сустрэчы ў 18:00. Перад стартам чэмпіянату мы ўжо сустракаліся з камандай Марэка Зуба. Матч у Гродне адбыўся 14 лютага і скончыўся ўпэўненай перамогай нашай каманды з лікам 2:0 (галамі адзначыліся Павел Забелін і Янік Н'Джэнг).

Пасля трынаццаці тураў «Жальгірыс» ідзе ў турнірнай табліцы чэмпіянату краіны на другой пазіцыі, адстаючы на пяць ачкоў ад «Судувы». Бела-зялёныя атрымалі дзевяць перамог, адзін раз згулялі ўнічыю і тры разы саступілі - «Стумбрасу» 1:2, «Рыцяраю» 0:1 і «Судуве» 0:1. У трынаццаці матчах віленчукі забілі 25 мячоў (лепшы паказчык у лізе разам з «Судувай»), прапусціўшы пры гэтым усяго 8 (другі паказчык А-Лігі). Спіс лепшых бамбардзіраў лігі ўзначальвае харват Таміслаў Кіш, які яшчэ ў мінулым сезоне выступаў у салігорскім «Шахцёры». На рахунку футбаліста 11 забітых мячоў. Пяць мячоў у чэмпіянаце забіў іспанец Пау Морэр, 4 разы засмуціў суперніка румын Лівіу Антал. Без замен ва ўсіх матчах чэмпіянату адыгралі тры футбалісты: галандзец Донаван Слійнгард, серб Марка Томіч і харват Таміслаў Кіш. Гульцамі асноўнага складу з'яўляюцца Мадэстас Вараб'ёвас (13 гульняў), Саўлюс Мікалюнас (13), іспанец Пау Морэр (12), Армантас Вітаўскас (10) і румын Лівіу Антал (10).