Павел САВІЦКІ: Буду старацца яшчэ не раз парадаваць свайго заўзятара Вярнуцца да спісу
Павел САВІЦКІ (паўабаронца «Нёмана»):
— Так каманда даўно не гуляла, можа надвор'е ўсяму віной?
— Думаю гэта проста таму, што мы добра сёння гулялі. Гульня супраць «Гарадзеі» была вельмі важная з пункту гледжання паляпшэння турнірнага становішча, мы рыхтаваліся да гэтай гульні, і нам патрэбна была толькі перамога. У мінулым туры ўсе нашы супернікі, якія знаходзяцца ніжэй нас, выйгралі свае матчы і вельмі блізка падабраліся. Напэўна, мы паказалі сёння ўсё, што маглі. Мы стараліся і ў нас усё атрымалася.
— Нядаўна гулялі з «Шахцёрам» у кубку, згулялі ў асноўны час унічыю і былі блізкія да іншага выніку, чым параза. Як ты думаеш можа скласціся наш матч у чэмпіянаце?
— Загадваць загадзя не буду. Як заўсёды мы будзем старацца гуляць на перамогу, каб парадаваць сваіх заўзятараў станоўчым вынікам.
— Чым растлумачыш сваю такую зверхвыніковасць – забіваеш за зборныя, забіваеш за клуб?
— Хочацца забіць – вось і забіваю! Больш майстэрства, больш шанцавання і ўдачы, ды і партнёры дапамагаюць – усё гэта ў сукупнасці дае такі вынік. Галоўная прычына, як я лічу, у тым, што ў мяне стала больш момантаў у гульні. Каманда гуляе лепш, больш атакуе і ў мяне з'яўляецца больш момантаў. Какая то частка з іх сканчаецца ўзяццем брамы.
— Дзве афіцыйныя гульні супраць «Гарадзеі» розныя. Летам прайгралі, цяпер атрымалі буйную перамогу.
— Мы ўважліва разабралі дзеянні праціўніка. У першай гульне яны добра згулялі на стандартах, а сёння мы не далі ім нічога зрабіць. Не ведаю, чаму так жа не атрымалася згуляць у Нясвіжы. Мы ж і тады гулялі нядрэнна, але здзейснілі некалькі памылак, якімі «Гарадзея» тады скарысталася. Тады прайгралі з-за сваіх памылак. Сёння такога шанцу праціўнік не атрымаў.
— У чэмпіянаце ты забіў ужо шэсць мячоў і зноў лідзіруеш у спісе бамбардзіраў клуба ў асобна ўзятым сезоне. На колькі дакладных удараў разлічваеш па заканчэнні чэмпіянату?
— Вядома, хочацца забіць яшчэ. Да канца сезона засталося чатыры гульні, а значыць час для гэтага яшчэ ёсць. Буду старацца яшчэ не раз парадаваць нашага заўзятара.
