Павел Забелін падпісаў кантракт Вярнуцца да спісу
Павел Забелін падпісаў кантракт з клубам тэрмінам на тры гады.
Выхаванец гродзенскага футбола ў абойме клуба знаходзіцца з 2011 года. На працягу пяці сезонаў Забелін выступаў за дублюючы склад клуба, правёўшы за гродзенскую маладзёжку 89 матчаў. Да гульняў першага складу стаў прыцягвацца з чэрвеня 2014 года, аднак дэбютаваць атрымалася толькі ў верасні. За сем хвілін да заканчэння хатняга матчу з магілёўскім «Дняпром» паўабаронца з'явіўся на поле выйшаўшы на замену замест Ігара Лісіцы. Да канца сезона 2014 года Павел сыграў яшчэ ў трох матчах, сумарна правёўшы ў першым дывізіёне на поле усяго 59 хвілін. На наступны год трэнерскі штаб стаў куды больш давяраць маладому футбалісту. І хай яму ўсё яшчэ даводзілася пачынаць гульню з лаўкі запасных, за сезон ён адыграў у 21 матчы чэмпіянату і 4 кубкавых паядынках. Менавіта ў кубкавай хатняй сустрэчы 1/4 фіналу супраць барысаўскага БАТЭ Паўлу ўдалося забіць свой першы мяч на такім высокім узроўні.
Перад пачаткам мінулага сезону Забелін быў аддадзены ў арэнду ў «Баранавічы». У другім дывізіёне паўабаронца правёў паў гады, дзе ў 13 матчах забіў чатыры мячы і двойчы асіставаў партнёрам па камандзе. Яшчэ дзве галявыя перадачы на свой рахунак Павел запісаў у кубкавых матчах. У летняе трансфернае акно перабраўся ў Вышэйшую лігу, дзе выступаў за мікашэвіцкі «Граніт», які ў той момант змагаўся за выжыванне. У Мікашэвічах упершыню стаў гуляць на пазіцыі абаронцы, правёў 14 матчаў і забіў 1 гол.
Падрабязная інфармацыя аб нашым гульцу ў любы момант даступная ў раздзеле ЖЗЛ. Жоўта-зялёныя людзі: Павел Забелін.
З вяртаннем у каманду, Павел!
