«Нёман» самы беларускамоўны клуб Вярнуцца да спісу

Па выніках сезона 2016 года наш клуб быў названы самым беларускамоўным ў краіне. Традыцыйнае апытанне было праведзена вядомым блогерам Ігарам Случакам, які, дарэчы, у пачатку ліпеня ўступіў у афіцыйны «Клуб Заўзятараў» гродзенскага «Нёмана». У мінулым сезоне мы былі толькі сёмымі ў рэйтынгу «Умовы для мовы», а ў гэтым змаглі ступіць на шэсць пазіцый наперад і падняцца на яго вяршыню.

Само галасаванне было праведзена ў некалькі этапаў. Дзякуючы шматступеннай сістэме адбору з усіх трох лігаў да фіналу заслужана дабраліся чатыры прадстаўнікі Вышэйшай Лігі: «Дынама-Мінск», «Крумкачы», «Гомель» і «Нёман». На нашу думку, як мінімум фіналу заслугоўваў яшчэ адзін мінскі клуб «Тарпеда-Мінск». Тарпедаўцы, у адрозненне ад фіналістаў, прасоўваюць свой клуб выключна на беларускай мове.

Усяго ў фінальным галасаванні прынялі ўдзел 2 262 чалавекі, з іх 1 011 аддалі галасы нашаму клубу. Адрыў ад «Крумкачоў», якія размясціліся следам за жоўта-зялёнымі склаў каля 17 адсоткаў. Дзякуй усім, хто заўважыў нашу сціплую працу ў гэтым кірунку і прагаласаваў за нас.

Аўтар праекта «Умовы для мовы» Ігар Случак так пракаментаваў вынікі галасавання гарадскому навіннаму парталу горада Гродна Hrodna.life:

«Мне здаецца, гэта ганарова, асабліва калі клуб абралі не эксперты, а беларускія заўзятары, бо яны абіралі не толькі розумам, але і сэрцам. Гэта было народнае галасаванне. Усе фіналісты годна і шырока выкарыстоўвалі беларускую мову — выпадковых каманд карыстальнікі Укантакце ў фінал не правялі, што вельмі радуе, бо гэтая сацыяльная сетка славіцца сваімі недобрасумленнымі падыходамі.

Тое, што «Нёман» перамог з вялікім адрывам, сведчыць аб тым, што клуб мае добрую падтрымку сярод фанатаў і заўзятараў не толькі Гродна. Клуб правёў цяжкі сезон, ледзьве ўтрымаўся ў Вышэйшай лізе, але шмат у чым і праз беларускую мову напрацягу ўсяго сезона да яго было добрае стаўленне. Беларуская мова працавала на пазітыўны імідж клуба, магчыма, у нечым і дапамагла яму застацца ў эліце — той жа «Граніт» прынцыпова адмаўляўся ад беларускай мовы і вылецеў у Першую лігу, хоць па гульні не так ужо і саступаў «Нёману». Супадзенне? Не думаю.

У гэтым годзе з-за адсутнасці часу і магчымасцяў не атрымалася зрабіць рэйтынг «Самы беларускамоўны спартовы клуб», які складаўся ў 2014 і 2015 гадах па вызначаных крытэрах і які безэмацыйны — перамагаў той, хто меў больш балаў. У 2015 годзе «Нёман» заняў высокае месца — 7-е з 120 клубаў краіны.

Шмат чаго «Нёман» робіць па-беларуску. У мінулым годзе пералік быў меншы ў два разы. Здаецца, што такімі тэмпамі беларусізацыю нарошчавала ў гэтым годзе толькі АБФФ. Таму федэрацыі трэба звярнуць на клуб увагу і неяк адзначыць гэтыя дасягненні, бо і федэрацыя і «Нёман» крочаць у адным накірунку і ў адным тэмпе — робяць наш футбол па-сапраўднаму нацыянальным і беларускім.

Было б цудоўна, каб на цырымоніі закрыцця футбольнага сезону «Зорны мяч 2017» з’явілася намінацыя «Самы беларускаарыентаваны» ці «Самы патрыятычны» клуб, або нейкая іншая намінацыя, якая ўганароўвала б клуб, што найбольш выкарыстоўваў беларускую мову і культуру ў сезоне. Выбіраць будзе з каго».

Нам вельмі прыемна атрымаць высокую адзнаку нашай працы. Застаецца толькі дадаць: Беларусь, Гродна і мова — заўсёды ў нашых сэрцах!