Васілючак і Забелін ў «Граніце» Вярнуцца да спісу
Галкіпер Уладзіслаў Васілючак і паўабаронца Павел Забелін з сённяшняга дня будуць абараняць колеры мікашэвіцкага «Граніту», які ўзяў гульцоў у арэнду да канца гэтага сезона.
Абодва гульца ў пачатку гэтага сезону былі таксама аддадзены ў арэнду, але толькі ў клубы Першай Лігі. Васілючак ў другім дывізіёне выступаў за «Смаргонь», а Забелін адыграў першы круг у «Баранавічах».
Брамнік правёў 5 каляндарных матчаў чэмпіянату, а таксама 2 матчы ў рамках Кубка Беларусі. У чатырох матчах з сямі Васілючак абараніў на нуль, прапусціўшы ўсяго 4 мяча.
— Усяго адыграў за смаргонскі клуб 7 матчаў. Першапачаткова была дамоўленасць, што будзем гуляць з Давыдавым па два матчы, аднак два разы чарговасць сваю прапусціў. Першы раз з-за мікратраўмы, другі раз з-за выкліку ў маладзёжку на матч супраць македонцаў. На прагляд у «Граніт» не ездзіў. 9 ліпеня мы гулялі супраць «Граніту» ў 1/16 Кубка Беларусі, калі яны ўжо страцілі шмат гульцоў. Мы выйгралі, а я не прапусціў. Можа быць таму мяне запрасілі без дадатковага прагляду. Калі Валерый Пятровіч патэлефанаваў і прапанаваў згуляць у Вышэйшай Лізе – адразу ж пагадзіўся. Вельмі хочацца зноў згуляць у наймацнейшай лізе і мець пастаянную гульнявую практыку. Першы матч гуляем дома супраць «Нёмана», і я спадзяюся, што мне дазволяць прыняць у гэтым матчы удзел.
Забелін ў трынаццаці матчах чэмпіянату забіў 4 галы і аддаў 2 выніковыя перадачы, а ў двух матчах кубка два разы асыставаў сваім партнёрам.
— На праглядзе ў «Граніце» быў на мінулым тыдні, з панядзелка па чацвер. За гэты перыяд згулялі толькі адзін кантрольны матч супраць дублёраў «Слуцка». У гэтай сустрэчы мы выйгралі 2:0, забіўшы два мяча ў апошняй дзесяцімінутцы. Я адыграў першы тайм і быў у перапынку заменены. Перыяд у «Баранавічах» смела магу занесці сабе ў актыў. Я атрымаў там тое, па што я туды ехаў – гульнявую практыку. Плюс атрымалася забіць чатыры мячы ў чэмпіянаце. Калі ў мінулым годзе ў «Нёмане» я толькі часам выходзіў на замену, то ў гэтым сезоне ў Першай Лізе я практычна гуляў ад званка да званка і набраў нядрэнную форму. Знаходжуся ў гульнявым тонусе і магу паказаць сябе на сто адсоткаў. Думаю, што дзякуючы гэтаму мне і ўдалося прайсці адбор і патрапіць у «Граніт». Арэнднае пагадненне разлічана да канца сезона. Таму ў мяне ёсць цэлы круг, каб замацавацца ў камандзе Вышэйшай Лігі.
