Годнае рашэнне Вярнуцца да спісу

Пасля паразы ў Брэсце галоўны трэнер гродзенскага клуба Сяргей Саладоўнікаў у распранальні сказаў камандзе, што рашэнне пакінуць каманду ён прыняў напярэдадні гэтай гульні. Хацелася, вядома, сысці, перамогшы суперніка, але і паразы трэба ўмець прымаць годна. На заканчэнні размовы, трэнер падзякаваў хлопцаў і трэнерскі штаб за доўгія гады сумеснай працы, а таксама пажадаў камандзе і гульцам поспехаў ў далейшым.

Сёння Сяргей Вітальевіч паведаміў кіраўніцтву клуба аб сваім рашэнні пакінуць пасаду галоўнага трэнера.

Мноства разнастайных рэкордаў «Нёмана» належыць Сяргею Саладоўнікаву. Знойдзецца месца і яшчэ аднаму. Думаецца, што пабіць яго наўрад ці каму ўдасца. У бліжэйшай будучыні так дакладна. Сяргей Вітальевіч ў якасці галоўнага трэнера каманды правёў у чэмпіянаце Беларусі за «Нёман» 355 матчаў. Гэта каля 12 паўнавартасных сезонаў, калі мераць 16-каманднымі чэмпіянатамі.

Дзякуй за шматгадовую нялёгкую працу. Дзякуй Вам за 161 гол у майцы нашага клуба, за ўзняты ў 1993 годзе Кубак Беларусі над галавой, за срэбра чэмпіянату 2002 года, за фінал кубка 2014 года, за мноства цікавых і захапляльных матчаў. Дзякуй за ўсё, Вітальевіч!

Выконваючым абавязкі галоўнага трэнера прызначаны Алег Кірэня, які да гэтага з 2009 года працаваў у камандзе памочнікам галоўнага трэнера. Поспехаў, Алег Іванавіч!