У чацвер згуляем у Літве Вярнуцца да спісу
У паўзе, якая выклікана міжнароднымі матчамі зборных, гродзенскі «Нёман» правядзе спарынг ў Літве. Супернікам нашага клуба будзе добра нам вядомы «Тракай» з аднайменнага горада. Матч адбудзецца ў чацвер і пройдзе ў Вільнюсе на поле Літоўскай Федэрацыі Футбола. Час пачатку сустрэчы а 15:00.
Наш будучы супернік у Чэмпіянаце Літвы зараз ідзе на другім месцы, адстаючы ад «Жальгірыса» на 10 ачкоў. У 26 матчах «рыцары» атрымалі 13 перамог і набралі 48 ачкоў.
У гэтым клубе выступае беларус Аляксандр Бычанок, а трэнерам брамнікаў працуе былы гулец нашага клуба Альберт Рыбак (11 сезонаў за «Нёман»). 19 верасня «рыцары» абвясцілі аб падпісанні паўтарагадовага кантракту з расійскім паўабаронцам Дыніярам Білялетдзінавым, які раней выступаў за маскоўскія клубы «Лакаматыў», «Спартак» і «Тарпеда», ліверпульскі «Эвертан», махачкалінскі «Анжы» і казанскі «Рубін».
Варта адзначыць, што за апошнія тры гады нашы каманды правялі ўжо 4 таварыскія сустрэчы, тры з якіх прайшлі ў Літве. У 2015 годзе гродзенцы буйна перайгралі літоўцаў з лікам 4:1. У сакавіку 2016 года перамога зноў была на баку жоўта-зялёных 3:1, а ў лістападзе каманды разышліся мірам 0:0. Перад стартам сезона 2017 года літоўцы ўпершыню прыехалі ў Гродна, дзе ў чарговы раз саступілі «Нёману» з лікам 0:2.
