Правілы паводзінаў

Правілы паводзін гледачоў на стадыёнах падчас правядзення футбольных матчаў і іншых масавых спаборніцтваў

Закон Рэспублікі Беларусь «Аб фізічнай культуры і спорце»

Дысцыплінарны кодэкс Асацыяцыі «Беларуская федэрацыя футбола»

 

Пасяджэнне бюро выканкама БФФ. 
Пратакол № 6 ад 27 сакавіка 2013 г.

Правілы паводзін гледачоў на стадыёнах падчас правядзення футбольных матчаў і іншых масавых спаборніцтваў

Гэтыя Правілы вызначаюць нормы паводзін гледачоў на стадыёне пры наведванні футбольных матчаў, якія праводзяцца на тэрыторыі Рэспублікі Беларусь

1. Агульныя палажэнні

1.1. Гледачамі прызнаюцца грамадзяне, якія прыбылі на стадыён пры наяўнасці ўваходнага білета, абанемента, запрашэння, іншых дакументаў устаноўленага ўзору, і не звязаныя з арганізацыяй і забеспячэннем правядзення матчу.

1.2. Арганізатар матчу дзеля забеспячэння бяспекі асобных катэгорый гледачоў можа ўводзіць асаблівыя ўмовы наведвання матчу для гэтых катэгорый з абавязковым паведамленнем аб прынятым рашэнні адміністрацыі стадыёна, праваахоўных органаў, гледачоў да пачатку рэалізацыі ўваходных білетаў.

1.3. Уваход у стадыён падразумявае прыняцце і добраахвотнае выкананне гледачамі дадзеных Правіл, якія дзейнічаюць на працягу ўсяго часу іх знаходжання на стадыёне.

1.4. Кантроль за выкананнем Правілаў ускладаецца на арганізатара матчу, супрацоўнікаў праваахоўных органаў, МНС, а таксама службаў стадыёна, якія прыцягваюцца для забеспячэння кантрольна-прапускнога рэжыму, рассаджвання гледачоў і аховы грамадскага парадку (службы бяспекі, кантралёры, адміністратары, сцюарды, валанцёры і інш.).

1.5. Гледачы, якія не выконваюць Правілы, не дапускаюцца на стадыён або выдаляюцца за яго межы без кампенсацыі кошту ўваходнага білета, а ў выпадках учынення імі супрацьпраўных дзеянняў прыцягваюцца да адміністрацыйнай або крымінальнай адказнасці.

1.6. Арганізатар матчу мае права праводзіць фота-, відэаздымкі гледачоў дзеля прадухілення супрацьпраўнай дзейнасці.

2. Гледачы маюць права:

2.1. Пры наяўнасці ўваходных білетаў, абанементаў, запрашэнняў, іншых дакументаў устаноўленага ўзору ўваходзіць на стадыён да і падчас матчу. Час пачатку праходу на стадыён вызначаецца сумесным рашэннем арганізатара матчу, адміністрацыі стадыёна і праваахоўных органаў.

2.2. Карыстацца ўсімі паслугамі, якія прапануюцца арганізатарамі матчу і адміністрацыяй стадыёна;

2.3. Прыносіць на трыбуны стадыёна і выкарыстоўваць:

- тытунёвыя вырабы і запальнічкі пры ўмове іх выкарыстання толькі ў спецыяльна адведзеных для курэння зонах;

- атрыбутыку, афіцыйна зацверджаную кіраўнікамі клубаў і мясцовых праваахоўных органаў;

2.4. Прадстаўнікам аб’яднанняў заўзятараў з мэтай падтрымкі каманды, пры прызначэнні адказных з ліку заўзятараў за кожную адзінку названых ніжэй сродкаў падтрымкі, дазволены пранос і выкарыстанне:

- барабанаў з адной мембранай, з адкрытым дном, дыяметрам да 60 см і вышынёй да 40 см, са штатнымі палачкамі;

- зацверджаных банераў розных канфігурацый, пры ўмове, што яны будуць размешчаны на трыбунах такім чынам, што не будуць перашкаджаць прагляду матчу іншымі гледачамі. Банеры павінны быць выраблены з неўзгаральных матэрыялаў. Змест банераў павінен быць накіраваны толькі на падтрымку свайго клуба, не змяшчаць абразлівых, нецэнзурных, правакацыйных тэкстаў, слоў, сімвалаў, малюнкаў;

- сцягоў на пластыкавым пустацелым дрэўку. Даўжыня дрэўка не можа перавышаць 1,5 м. Сцягі павінны быць выраблены з неўзгаральных матэрыялаў. Выкарыстанне такіх сцягоў дазволена на «гасцявым» і «фанацкім» сектарах. Змест малюнкаў на сцягах павінен быць накіраваны толькі на падтрымку свайго клуба, не змяшчаць абразлівых, нецэнзурных, правакацыйных тэкстаў, слоў, сімвалаў, малюнкаў.

Сродкі падтрымкі, якія змяшчаюць словы і выразы на замежнай мове, павінны мець рускі пераклад.

Сродкі падтрымкі, якія змяшчаюць абрэвіятуры і спалучэнні лічбаў, павінны быць зацверджаны кіраўніцтвам клуба і тэрытарыяльнымі праваахоўнымі органамі.

У выпадку парушэння гледачамі дадзеных Правілаў можа быць прынята рашэнне аб забароне выкарыстання на футбольных матчах вышэйпералічаных сродкаў падтрымкі.

3. Гледачы абавязаны:

3.1. Прад’яўляць супрацоўнікам, якія ажыццяўляюць кантрольна-прапускны рэжым, уваходныя білеты, абанементы, запрашэнні, іншыя дакументы, якія даюць права праходу на стадыён, а таксама пропуску на ўезд аўтатранспарту на прылеглую тэрыторыю;

3.2. Дзеля гарантавання бяспекі і недапушчэння праносу забароненых прадметаў пры ўваходзе на стадыён, а ў некаторых выпадках – пры ўваходзе на прылеглую абгароджаную тэрыторыю, праходзіць спецкантроль (дагляд);

3.3. Займаць месцы на трыбунах згодна з уваходнымі білетамі, абанементамі і запрашэннямі;

3.4. Выконваць законныя распараджэнні арганізатара матчу, адміністрацыі стадыёна, супрацоўнікаў праваахоўных органаў і МНС, захоўваць грамадскі парадак і агульнапрынятыя нормы паводзін;

3.5. Неадкладна паведамляць адміністрацыі стадыёна і супрацоўнікам праваахоўных органаў аб выпадках выяўлення падазроных прадметаў, выпадках задымлення ці пажару, учыненых правапарушэнняў, іншых пагрозах бяспекі;

3.6. Ашчадна ставіцца да маёмасці стадыёна, захоўваць чысціню.

4. Гледачам забараняецца:

4.1. Знаходзіцца на стадыёне ў стане алкагольнага, наркатычнага або таксічнага ап’янення;

4.2. Праносіць на стадыён, выкарыстоўваць, прыводзіць у дзеянне:

- спіртныя напоі; любога віду зброю і боепрыпасы; колючыя або рэжучыя прадметы; дымавыя шашкі; фаеры; сігнальныя ракеты; петарды; піратэхніку, іншыя рэчывы, прадметы, вырабы, у тым ліку ўласнага прыгатавання, выкарыстанне якіх можа прывесці да задымлення, ўзгарання і іншых негатыўных наступстваў; вогненебяспечныя, выбуховыя, ядавітыя, атручвальныя і з’едліва пахнучыя рэчывы; лёгкаўзгаральныя, пажаранебяспечныя матэрыялы і прадметы; фарбавальныя рэчывы; наркатычныя сродкі; радыеактыўныя матэрыялы; газавыя балончыкі нервова-паралітычнага і слезацечнага ўздзеяння; лазерныя прылады; іншыя прадметы, якія могуць быць выкарыстаны ў якасці зброі; бляшанкі, шкляны, пластыкавы посуд, бутэлькі і ёмістасці; буйнагабарытныя рэчы, якія замінаюць іншым гледачам, а таксама нармальнаму правядзенню мерапрыемства; барабаны, дудкі, мегафоны і іншыя падобныя прадметы, прафесійную фота- і відэатэхніку, сродкі для трансляцыі праз інтэрнэт; радыёстанцыі; рэчы, памеры якіх перавышаюць 25х25х25 см, прадметы, якія могуць быць выкарыстаны як кідальныя: парасоны тыпу «Кій», упакоўкі «Тэтрапак».

4.3. Курыць у месцах, дзе гэта забаронена адміністрацыяй стадыёна;

4.4. Распальваць агонь;

4.5. Кідаць прадметы на трыбуны, футбольнае поле і прастору вакол яго, а таксама мэтанакіравана – у гледачоў, футбалістаў, трэнераў, суддзяў, прадстаўнікоў клубаў, стадыёна, супрацоўнікаў праваахоўных органаў, афіцыйных асоб арганізатара спаборніцтваў;

4.6. Насіць і выстаўляць напаказ знакі, атрыбутыку і іншую сімволіку фашысцкага і расісцкага характару;

4.7. Выкарыстоўваць словы і выразы, а таксама жэстыкуляцыю фашысцкага і расісцкага характару;

4.8. Выкарыстоўваць нецэнзурныя і абразлівыя словы і выразы, а таксама жэстыкуляцыю;

4.9. Выкарыстоўваць атрыбутыку, банеры, скандзіраванне, выкрыкі, жэстыкуляцыю, што ўзбуджаюць сацыяльную, расавую, рэлігійную, нацыянальную і міждзяржаўную нянавісць, а таксама сацыяльную, расавую, рэлігійную, нацыянальную і міждзяржаўную перавагу;

4.10. Выкарыстоўваць элементы адзення, іншыя прадметы і метады з мэтай утойвання асобы;

4.11. Парушаць грамадскую мараль і нормы паводзін шляхам агалення частак цела падчас знаходжання на стадыёне;

4.12. Паводзіць сябе правакацыйна, пагрозліва ў дачыненні да іншых гледачоў і ўдзельнікаў матчу, ствараць пагрозу жыццю і бяспецы сабе, іншым асобам, ці ставіць пад небяспеку каго б там ні было, якім бы ні было чынам;

4.13. Выходзіць за агароджы да футбольнага поля і на яго, з’яўляцца ў распранальнях каманд, суддзяў, прэс-цэнтрах і іншых службовых памяшканнях.

4.14. Знаходзіцца падчас правядзення матчу ў праходах, на лесвіцах, ствараць перашкоды перамяшчэнню ўдзельнікаў і гледачоў, станавіцца на месцы для сядзення, скакаць, імітаваць супрацьпраўныя дзеянні, знаходзячыся на трыбунах, залазіць на агароджы, парапеты, асвятляльныя прылады, мачты, нясучыя канструкцыі, наносіць шкоду маёмасці спартыўных збудаванняў і гледачоў;

4.15. Прыходзіць на стадыён з жывёламі;

4.16. Праводзіць любыя палітычныя акцыі;

4.17. Ажыццяўляць гандаль, распаўсюджваць любым спосабам прадукцыю рэкламнага, сувенірнага, палітычнага, рэлігійнага і расісцкага характару (уключаючы плакаты, улёткі, буклеты);

4.18. Ажыццяўляць спекуляцыйны гандаль з рук уваходнымі білетамі на матч.

Закон Рэспублікі Беларусь «Аб фізічнай культуры і спорце» ад 4 студзеня 2014 года № 125-З

Артыкул 36. Меры па ахове грамадскага парадку і забеспячэнні грамадскай бяспекі пры правядзенні спартыўна-масавых мерапрыемстваў

Пры правядзенні спартыўна-масавых мерапрыемстваў ахова грамадскага парадку і забеспячэнне грамадскай бяспекі на тэрыторыі фізкультурна-спартыўных збудаванняў і спецыяльна абсталяваных месцаў для заўзятараў, а таксама на тэрыторыі, прылеглай да фізкультурна-спартыўных збудаванняў, шляхах эвакуацыі і ў грамадскіх месцах, прылеглых да месцаў правядзення спартыўна-масавых мерапрыемстваў, ажыццяўляюцца ў парадку, устаноўленым заканадаўствам.

З мэтай аховы грамадскага парадку і забеспячэння грамадскай бяспекі падчас правядзення спартыўна-масавых мерапрыемстваў на тэрыторыю фізкультурна-спартыўных збудаванняў і спецыяльна абсталяваных месцаў для заўзятараў не дапускаюцца асобы, якія:

  • не маюць ва ўстаноўленых выпадках уваходнага білета ці іншага дакумента, які дае права праходу на тэрыторыю фізкультурна-спартыўных збудаванняў і спецыяльна абсталяваных месцаў для заўзятараў;
  • хаваюць свае твары пад маскамі;
  • адмаўляюцца ад асабістага дагляду альбо ад дагляду iх рэчаў;
  • маюць пры сабе:
  • прадметы і рэчывы, забароненыя да праносу Правіламі бяспекі правядзення заняткаў фізічнай культурай і спортам, у тым ліку алкагольныя, слабаалкагольныя напоі, піва, наркатычныя сродкі, псіхатропныя рэчывы, іх аналагі, таксічныя або іншыя адурманьваючыя рэчывы, халодную, агнястрэльную, газавую цi iншую зброю, складовыя часткі і кампаненты зброі, выбуховыя рэчывы і боепрыпасы, спецыяльна вырабленыя або прыстасаваныя прадметы, выкарыстанне якіх можа ўяўляць пагрозу жыццю і здароўю людзей, прычыніць матэрыяльную шкоду фізічным асобам, арганізацыям, перашкаджаць правядзенню спартыўна-масавага мерапрыемства, за выключэннем выпадкаў, прадугледжаных заканадаўчымі актамі;
  • імітатары і муляжы халоднай, агнястрэльнай, газавай цi iншай зброi, выбуховых рэчываў і боепрыпасаў;
  • сцягі, вымпелы, не зарэгістраваныя ва ўстаноўленым парадку, а таксама эмблемы, сімвалы, плакаты, транспаранты і іншыя сродкі, змест якіх накіраваны на прычыненне шкоды грамадскаму парадку, правам і законным інтарэсам грамадзян, а таксама на прапаганду вайны ці звязаны з экстрэмісцкай дзейнасцю;
  • знаходзяцца ў стане алкагольнага ап’янення або ў стане, выкліканым ужываннем наркатычных сродкаў, псіхатропных рэчываў, іх аналагаў, таксічных або іншых адурманьваючых рэчываў;
  • учыняюць іншыя дзеянні, якія парушаюць устаноўлены парадак арганізацыі і правядзення спартыўна-масавага мерапрыемства, перашкаджаюць ажыццяўленню мер па ахове грамадскага парадку і забеспячэнні грамадскай бяспекі, а таксама падбухторваюць іншых асоб да такіх дзеянняў любымі метадамі.

Супрацоўнікі органаў унутраных спраў, якія выконваюць абавязкі па ахове грамадскага парадку, маюць права праводзіць асабісты дагляд грамадзян і дагляд iх рэчаў, у тым ліку з дапамогай тэхнічных і спецыяльных сродкаў. Асабісты дагляд грамадзян ажыццяўляецца асобай таго самага полу, што і дагляданая асоба.

Падчас правядзення спартыўна-масавых мерапрыемстваў на тэрыторыі фізкультурна-спартыўных збудаванняў і спецыяльна абсталяваных месцаў для заўзятараў забараняецца:

  • знаходзіцца ў стане алкагольнага ап’янення або ў стане, выкліканым ужываннем наркатычных сродкаў, псіхатропных рэчываў, іх аналагаў, таксічных або іншых адурманьваючых рэчываў;
  • мець пры сабе і (або) выкарыстоўваць прадметы і рэчывы, забароненыя да праносу Правіламі бяспекі правядзення заняткаў фізічнай культурай і спортам, у тым ліку алкагольныя, слабаалкагольныя напоі, піва, халодную, агнястрэльную, газавую цi iншую зброю, складовыя часткі і кампаненты зброі, выбуховыя рэчывы і боепрыпасы, спецыяльна вырабленыя або прыстасаваныя прадметы, выкарыстанне якіх можа ўяўляць пагрозу жыццю і здароўю людзей, прычыніць матэрыяльную шкоду фізічным асобам, арганізацыям, перашкаджаць правядзенню спартыўна-масавага мерапрыемства, за выключэннем выпадкаў, прадугледжаных заканадаўчымі актамі;
  • мець пры сабе і (або) выкарыстоўваць імітатары і муляжы халоднай, агнястрэльнай, газавай цi iншай зброi, выбуховых рэчываў і боепрыпасаў;
  • распіваць у не прызначаных для гэтага месцах алкагольныя, слабаалкагольныя напоі, а таксама піва;
  • карыстацца крыніцамі адкрытага агню, курыць, спажываць наркатычныя сродкі, псіхатропныя рэчывы, іх аналагі, таксічныя або іншыя адурманьваючыя рэчывы;
  • хаваць свае твары пад маскамі, дзейнічаць метадамі, якiя ствараюць пагрозу грамадскай бяспецы, жыццю і здароўю спартсменаў, трэнераў, суддзяў па спорце, якія ўдзельнічаюць у спартыўна-масавых мерапрыемствах, заўзятараў і (або) іншых фізічных асоб, што знаходзяцца ў месцах правядзення спартыўна-масавых мерапрыемстваў, за выключэннем выпадкаў, прадугледжаных заканадаўчымі актамі;
  • ажыццяўляць прапаганду вайны або экстрэмісцкую дзейнасць, у тым ліку з выкарыстаннем плакатаў, транспарантаў ці іншых сродкаў;
  • мець пры сабе і (або) карыстацца сцягамі, вымпеламі, не зарэгістраванымі ва ўстаноўленым парадку, а таксама эмблемамі, сімваламі, плакатамі, транспарантамі і іншымі сродкамі, змест якіх накіраваны на прычыненне шкоды грамадскаму парадку, правам і законным інтарэсам грамадзян;
  • уздзейнічаць у якой бы там ні было форме на супрацоўнікаў органаў унутраных спраў з мэтай не дапусцiць выканання імі службовых абавязкаў, а таксама на арганізатараў спартыўна-масавых мерапрыемстваў, адміністрацыю і іншых работнікаў, якія ажыццяўляюць абслугоўванне фізкультурна-спартыўных збудаванняў, прадстаўнікоў грамадскасці, якія выконваюць абавязкі па ахове грамадскага парадку, з мэтай перашкодзіць выкананню імі службовых і грамадскіх абавязкаў па ахове грамадскага парадку і забеспячэнні грамадскай бяспекі;
  • учыняць іншыя дзеянні, якія парушаюць устаноўлены парадак арганізацыі і правядзення спартыўна-масавых мерапрыемстваў, а таксама падбухторваць іншых асоб да такіх дзеянняў любымі метадамі.

Асобы, якія не трымаюцца названых абмежаванняў, выдвараюцца за межы тэрыторыі фізкультурна-спартыўных збудаванняў і спецыяльна абсталяваных месцаў для заўзятараў без кампенсацыі кошту ўваходнага білета і прыцягваюцца да адказнасці ў выпадках, устаноўленых заканадаўчымі актамі.

Дысцыплінарны кодэкс Асацыяцыі «Беларуская федэрацыя футбола»

Артыкул 14. Дысцыплінарныя пакаранні, якія могуць быць ужытыя ў дачыненні да членаў Асацыяцыі

1. У дачыненні да членаў Асацыяцыі могуць быць ужытыя наступныя дысцыплінарныя пакаранні:

  1. папярэджанне;
  2. штраф;
  3. пазбаўленне атрыманых узнагарод (грашовых прэмій).

2. У дачыненні да футбольных клубаў (каманд) акрамя пакаранняў, прадугледжаных часткай першай гэтага артыкула, могуць быць ужытыя таксама наступныя дысцыплінарныя пакаранні:

  1. часовая або бестэрміновая забарона на ажыццяўленне трансфераў (рэгістрацыю футбалістаў);
  2. пазбаўленне пэўнай колькасці набраных ачкоў;
  3. паніжэнне футбольнага клуба (каманды) у лігавым рангу;
  4. адмена (ануляванне) выніку футбольнага матчу, у тым ліку і з перагульваннем футбольнага матчу;
  5. прысуджэнне «тэхнічнага паражэння»;
  6. правядзенне «хатняга» футбольнага матчу без гледачоў;
  7. забарона на правядзенне футбольнага матчу на «хатнім» стадыёне;
  8. правядзенне футбольнага матчу на нейтральным стадыёне;
  9. выключэнне футбольнага клуба (каманды) з ліку ўдзельнікаў спаборніцтваў.

3. Пакаранні ў выглядзе правядзення «хатняга» футбольнага матчу без гледачоў, правядзення футбольнага матчу на нейтральным стадыёне, забароны на правядзенне футбольнага матчу на «хатнім» стадыёне, не рэалізаваныя ці не завершаныя ў бягучым спаборніцтве, пераносяцца на наступнае аналагічнае спаборніцтва.

Артыкул 16. Дысцыплінарныя пакаранні ў дачыненні да гледачоў

У дачыненні да фiзiчнай асобы з ліку гледачоў можа быць ужыта тэрміновая альбо бестэрміновая забарона на наведванне стадыёна (стадыёнаў).

Артыкул 22. Забарона на наведванне стадыёна (стадыёнаў)

Забарона на наведванне стадыёнаў азначае, што асобе забараняецца на працягу пэўнага часу альбо бестэрмінова наведваць футбольныя матчы, якія праводзяцца пад эгідай Асацыяцыі, ФІФА або УЕФА на пэўным стадыёне альбо стадыёнах.

Артыкул 26. Правядзенне футбольнага матчу на нейтральным стадыёне

Правядзенне футбольнага матчу на нейтральным стадыёне абавязвае футбольны клуб (каманду) – гаспадара поля забяспечыць правядзенне футбольнага матчу (матчаў) у іншым населеным пункце, што знаходзіцца не бліжэй за 60 км ад «хатняга» стадыёна гэтага футбольнага клуба (каманды).

Артыкул 28. Правядзенне «хатняга» футбольнага матчу без гледачоў

Правядзенне матчу без гледачоў азначае абавязак пакаранага такім чынам футбольнага клуба (каманды) правесці футбольны матч (футбольныя матчы), гаспадаром якога (якіх) ён з’яўляецца, без прысутнасці гледачоў.

Артыкул 29. Забарона на правядзенне футбольнага матчу на «хатнім» стадыёне

Забарона на правядзенне футбольнага матчу на «хатнім» стадыёне пазбаўляе адпаведны футбольны клуб (каманду) права правядзення футбольнага матчу (матчаў), гаспадаром якога (якіх) ён з’яўляецца, на «хатнім» стадыёне.

Артыкул 73. Расізм і дыскрымінацыя

1. Паводзіны, якія публічна прыніжаюць альбо абражаюць годнасць чалавека ў сувязі з яго расавай прыналежнасцю, мовай, веравызнаннем або этнічным паходжаннем, цягнуць дыскваліфікацыю на тэрмін ад 5 да 15 матчаў і (або) часовую або бестэрміновую забарону на наведванне футбольных матчаў на пэўным стадыёне (стадыёнах) з адначасовым накладаннем штрафу ў памеры ад 50 да 100 базавых велічынь, а ў выпадку ўчынення дадзенага парушэння афіцыйнай асобай – у памеры ад 100 да 200 базавых велічынь. Пры ўчыненні названых дзеянняў футбалістам ці афіцыйнай асобай у адпаведнага футбольнага клуба (каманды) адымаюцца тры ачкі з агульнай сумы ачкоў, набытых у бягучым спаборніцтве. У выпадку паўторнага парушэння ў футбольнага клуба (каманды) адымаюцца шэсць ачкоў з агульнай сумы ачкоў, набытых у бягучым спаборніцтве, а ў выпадку ўчынення далейшых падобных парушэнняў адпаведны футбольны клуб (каманда) паніжаецца ў лігавым рангу, а калі вышэйпаказаныя дзеянні адбыліся ў кубкавых матчах, футбольны клуб (каманда) падлягае дыскваліфікацыі і выключэнню з бягучага спаборніцтва.

2. Расісцкія альбо дыскрымінацыйныя паводзіны гледачоў, у тым ліку дэманстрацыя сцягоў, плакатаў, банераў, выкрыкванне лозунгаў названага зместу цягне накладанне часовай забароны на вінаватую асобу ад 6 месяцаў да двух гадоў альбо бестэрміновай забароны на наведванне стадыёна (стадыёнаў), а на футбольны клуб, які падтрымліваецца вінаватымі асобамі, – накладанне штрафу ў памеры ад 100 да 1000 базавых велічынь і (або) правядзенне чарговага афіцыйнага «хатняга» матчу без гледачоў. У выпадку немагчымасці выяўлення прыналежнасці вінаватых асоб (гледачоў) да якога-небудзь футбольнага клуба (каманды) пакаранне накладаецца на футбольны клуб, які з’яўляўся ў матчы гаспадаром поля.

Артыкул 74. Падбухторванне да праяўлення агрэсіі і ўжывання сілы

Падбухторванне да праяўлення агрэсіі альбо прымянення сілы караецца часовай дыскваліфікацыяй на тэрмін ад 3 да 6 месяцаў, а афіцыйная асоба матчу – часовай дыскваліфікацыяй ад 6 да 12 матчаў з адначасовым накладаннем штрафу ў памеры ад 50 да 100 базавых велічынь. У выпадку ўчынення дадзенага правапарушэння з выкарыстаннем сродкаў масавай інфармацыі і непасрэдна ў дзень правядзення футбольнага матчу памер штрафу складае ад 100 да 300 базавых велічынь.

Артыкул 77. Скандзіраванне гледачамі ненарматыўнай лексікі і абразлівых выразаў

Скандзіраванне (г.зн. паўтаральнае масавае выкрыкванне) гледачамі на стадыёне ненарматыўнай лексікі і / або абразлівых выразаў да, падчас і пасля матчу караецца штрафам у памеры ад 50 да 100 базавых велічынь.

Артыкул 78. Дэманстрацыя гледачамі сродкаў нагляднай агітацыі абразлівага характару альбо такіх, што змяшчаюць ненарматыўную лексіку

Публічная дэманстрацыя гледачамі на стадыёне банераў, плакатаў, транспарантаў і іншых сродкаў нагляднай агітацыі абразлівага характару альбо такіх, што змяшчаюць ненарматыўную лексіку, караецца штрафам у памеры ад 50 да 100 базавых велічынь.

Артыкул 79. Выкарыстанне і кіданне гледачамі піратэхнічных вырабаў

1. Выкарыстанне гледачамі на стадыёне піратэхнічных вырабаў да, падчас і пасля матчу без кідання на трыбуны, поле і прылеглую да поля тэрыторыю караецца штрафам у памеры ад 10 да 100 базавых велічынь.

2. Кіданне гледачамі піратэхнічных вырабаў да, падчас і пасля матчу на трыбуны, поле і прылеглую да поля тэрыторыю караецца штрафам у памеры ад 50 да 150 базавых велічынь.

3. У выпадку траплення піратэхнічных вырабаў, кінутых гледачамі ў футбалістаў, афіцыйных асоб клуба (каманды), афіцыйных асоб матчу, заўзятараў, пакаранне прызначаецца ў выглядзе штрафу ў памеры ад 50 да 150 базавых велічынь і / або правядзення без гледачоў ад 1 (аднаго) да 3 (трох) матчаў або правядзення на нейтральным стадыёне ў іншым горадзе ад 1 (аднаго) да 3 (трох) матчаў.

Заўвага. Пад санкцыі, устаноўленыя арт.77–79 гэтага Кодэкса, могуць падпадаць як фізічныя асобы, так і футбольныя клубы (г.зн. футбольны клуб, да якога ўстаноўлена дачыненне асоб, што ўчынілі адпаведныя дзеянні). Калі такое дачыненне не ўстаноўлена ні да аднаго з футбольных клубаў, адказнасць за дадзенае дысцыплінарнае парушэнне нясе клуб – гаспадар поля.

Артыкул 84. З’яўленне на полі старонніх асоб і жывёл

1. З’яўленне на полі старонніх асоб, г.зн. выхад на поле без дазволу суддзі асоб, якія не павінны знаходзіцца на полі ў адпаведнасці з Правіламі гульні, караецца штрафам у памеры ад 10 да 100 базавых велічынь.

Заўвага. У выпадку ўчынення дадзенага парушэння гледачом штраф накладаецца на футбольны клуб, які падтрымлівае парушальнік, а калі дачыненне гледача да канкрэтнага клуба не ўстаноўлена, то штраф накладаецца на футбольны клуб, які з’яўляўся ў матчы гаспадаром поля.

2. За з’яўленне на полі жывёл прымаючы бок караецца папярэджаннем або штрафам у памеры ад 5 да 50 базавых велічынь.

Артыкул 90. Незабеспячэнне грамадскага парадку і бяспекі

Незабеспячэнне прымаючым бокам грамадскага парадку і бяспекі на стадыёне, што пацягнула парушэнне гледачамі грамадскага парадку, беспарадкі альбо паставіла пад пагрозу бяспеку асоб, якія знаходзяцца на стадыёне, караецца штрафам у памеры ад 100 да 500 базавых велічынь, а ў выпадку сур’ёзных наступстваў – таксама правядзеннем без гледачоў ад 1 (аднаго) да 5 (пяці) матчаў або правядзеннем на нейтральным стадыёне ў іншым горадзе ад 1 (аднаго) да 5 (пяці) матчаў.