Гродзенцы, прыходзьце на футбол! Вярнуцца да спісу

Мы ў чарговы раз клічам гарадзенцаў на футбол.

Сёння, адразу ж пасля чарговай сваёй трэніроўкі, нашы юныя футбалісты з велізарным задавальненнем накіраваліся ў цэнтр горада. Перад імі была пастаўлена сур'ёзная задача - уручыць усмешлівым і ветлым гарадзенцам запрашэнне на заўтрашнюю гульню нашай галоўнай каманды супраць жодзінскіх тарпедаўцаў.

З аднаго боку міні-лістоўкі быў уласна анонс футбольных сустрэч - дубля і асновы, а з адваротнага боку гараджане змаглі знайсці інфармацыю пра паслугі, якія прадастаўляе Цэнтральны спартыўны комплекс «Нёман». За 40 хвілін хлапчукі раздалі больш за 1 000 такіх запрашэнняў!

Заўтра ў нашым горадзе пачнецца XI Рэспубліканскі фестываль нацыянальных культур і ў гродзенцаў, безумоўна, будзе велізарны выбар куды схадзіць, і на што паглядзець. Вельмі хочацца, каб у гэтым шчыльным графіку жаданых для прагляду мерапрыемстваў знайшоўся час і на футбол. Плануйце свой суботні вечар так, каб мы змаглі заўтра сустрэцца на нашым стадыёне ЦСК «Нёман», дзе жоўта-зялёныя будуць змагацца з уладальнікам Кубка Беларусі 2016 года жодзінскім «Тарпеда-БелАЗ». Час пачатку сустрэчы ў 18:30!

P.S. Дзякуем за сумесна праведзеную акцыю кіраўніцтва ЦСК «Нёман»!

ФОТА